वीरगञ्ज- वीरगञ्ज घण्टाघरस्थित भत्किएको बाटो यो वर्ष पनि मर्मत नहुने भएको छ। त्रिभुवन राजपथअन्तर्गत पर्ने सो सडक मर्मतका लागि सडक विभागले निकालेको ठेक्का रद्द भएपछि मर्मत अन्योलमा परेको हो।
यो वर्ष पनि वीरगञ्जका बासिन्दाले हिलाम्य सडकमा हिँड्नुपर्ने भएको छ। वीरगञ्जको पावर हाउसदेखि रजतजयन्ति चोकसम्म ६ किलोमिटर सडक मर्मतका लागि सडक विभागको वीरगञ्ज-पथलैया व्यापारिक मार्ग आयोजनाले ठेक्का निकालेको थियो। सो ठक्कामा एउटामात्रै निर्माण कम्पनीले आवदेन दिएको थियो।
निर्माण कम्पनीले सडक विभागले राखेको अधिकतम रकमभन्दा बढीमा ठेक्का प्रस्ताव गरेपछि रद्द गरिएको आयोजना प्रमुख मनिष साहले बताए। ‘एउटामात्रै निर्माण कम्पनीले ठेक्काको आवदेन हाले पनि सम्झौता गर्न सकिने थियो। तर, अधिकतम रकमभन्दा बढीको प्रस्ताव आएकाले ठेक्का नै रद्द गर्नुपर्यो,’ साहले भने।
सडक विभागको अधिकारक्षेत्रमा पर्ने त्रिभुवन राजपथअन्तर्गतको सो सडक वर्षौदेखि मर्मत हुन सकेको छैन। वीरगञ्जको मुख्य बजार घण्टाघरबाट माईस्थान जाने बाटो भत्किएर जीर्ण भएको लामो समय बितिसकेको छ।
यसै त साँघुरो सडक, त्यसमाथि भत्किएर खाल्डैखाल्डा। कसरी हिँडिरहेका होलान् वीरगञ्जवासी ?त्रिभुवन राजपथअन्तर्गत वीरगञ्जको गण्डकदेखि मितेरीपुल खण्ड विस्तारको विषय सर्वोच्च अदालतमा विचाराधीन रहेकाले सडक विभागले मर्मतमा उदासीनता देखाउँदै आएको थियो।विभागले बल्लतल्ल सडक मर्मतको ठेक्का आह्वान गरेकोमा त्यो पनि रद्द भएको छ।