कोरोना संकट बढ्दै गर्दा चीनको व्यापारिक राजधानी सांघाईमा प्रहरी र स्थानीय बासिन्दाबीच झडप भएको छ।

प्रहरी-नागरिक झडपका भिडियो सामाजिक सञ्जालमा सार्वजनिक भएका छन्। स्थानीय बासिन्दालाई प्रहरीले जबर्जस्ती घरभित्र राखिएको छ। जो बाहिर निस्किन खोज्छन्, प्रहरीसँग विवाद हुन्छ। र, पछिल्ला झडप त्यसैको उपज भएको अन्तर्राष्ट्रिय समाचार एजेन्सीहरूले जनाएका छन्।

कोरोना प्रसार रोक्न सांघाईमा तीन सातादेखि लकडाउन जारी छ। कतिपय आवासीय इलाकालाई सरकारले क्वारेन्टिन सेन्टर बनाइरहेको छ।

शहरमा कोरोनाको नयाँ लहरका कारण लाखौँ स्थानीयवासी घरभित्रै कैद छन्। जतिलाई कोभिड–१९ पजिटिभ देखिन्छ, सरकारले क्वारेन्टिनमा पठाउँछ। तर, दैनिक २० हजारभन्दा बढी संक्रमित थपिन थालेपछि सरकारसामु क्वारेन्टिन सेन्टर व्यवस्थापनको चुनौति पनि थपिएको छ।

पछिल्ला सातामा सांघाईका प्रदर्शनी हल र विद्यालयहरूलाई क्वारेन्टिन सेन्टरमा परिणत गरिएको छ। अस्थायी अस्पतालहरू धमाधम थपिएका छन्। स्थानीय बासिन्दाले सरकारी कडाइको विरोध गरिरहेका छन्। त्यसका लागि सामाजिक सञ्जालको प्रयोग ज्यादा छ। र, पर्याप्त खाने-पिउने वस्तु अभाव भएको गुनासो गरिरहेका छन्।

लकडाउनका कारण डेलिभरी सेवा, खाना, पानी घर-घर पुर्‍याउने वेबसाइटहरू तथा सरकारी आपूर्ति व्यवस्था पनि प्रभावित भएका छन्।