भारत आन्ध्रप्रदेशको इलुरू जिल्लामा एक रासायनिक कारखानामा लागेको आगोमा परी ६ जनाको ज्यान गएको छ। घटनामा अन्य १२ जना घाइते भएका छन्।

इलुरू प्रहरीका एसपी देव शर्माका अनुसार घाइतेहरूको विजयबाडाको एक सरकारी अस्पतालमा उपचार भइरहेको छ। पोलिमर पावर बनाउने संयन्त्रको रियाक्टरमा लागेको आगो पूरै कारखाना फैलिएको उनले जानकारी दिए।

उक्त कारखानामा नाइट्रिक एसिड र मोनोमेथिल उत्पादन हुन्छ। आगलागीका बेला काममा रहेका कामदार कारखानाभित्रै फसेका थिए। समाचार एजेन्सी पीटीआईले चिकित्सकहरूलाई उद्धृत गर्दै जनाएअनुसार घाइतेमध्ये चारजनाको अवस्था गम्भीर छ।

प्रदेशका मुख्यमन्त्री वाईएस जगमोहन रेड्डीले मृतकका परिवारलाई २५ लाख, गम्भीर घाइतेलाई पाँच लाख र सामान्य घाइतेलाई दुई लाख रुपैयाँ राहत दिने घोषणा गरेका छन्।