नयाँदिल्ली- नवरात्रि धार्मिक र आध्यात्मिक हिसाबबाट मात्र महत्त्वपूर्ण छैन । यस अवधिमा माता दुर्गा भवानीका ९ वटा गुणलाई आत्मसात गर्ने संकल्प गर्न सक्दा जीवन सुखदायी हुनेछ ।
खासगरी, दुर्गा भवानीका ९ गुणमध्ये धैर्य, सहनशीलता, शक्ति र साहसले जीवन सुखमय बनाउन मद्दत गर्छन् ।
संसारभरका हिन्दू धर्मावलम्बीका लागि नवरात्र विशेष महत्त्वको पर्व हो । यसलाई उपवास र भक्तिमा मात्र सीमित नगरी आध्यात्मिक चिन्तन, पवित्रता र आफैंमा परिवर्तन ल्याउन माता दुर्गाका गुणहरूले प्रेरणा दिन्छन् । यो यस्तो पर्व हो, जसले मानिसभित्र सकारात्मक परिवर्तन ल्याउन कोशिस गराउन सक्छ ।
यस अवधिमा हरेक दिन माता दुर्गाका ९ अलग-अलग स्वरूपहरूको पूजा हुन्छ । र, ती हरेक स्वरूपका आ-आफ्ना गुण छन् । ती हुन्- धैर्य, सहनशीलता, भक्ति, शक्ति, तपस्या, साहस, धर्म, पवित्रता र सिद्धि ।
कुन दिन कसको पूजा ?
– पहिलो दिन- माता शैलपुत्री
– दोस्रो दिन- माता ब्रह्मचारिणी
– तेस्रो दिन- माता चन्द्रघण्टा
– चौथो दिन- माता कुष्माण्डा
– पाँचौं दिन- स्कन्दमाता
– छैटौं दिन- माता कात्यायनी
– सातौ दिन- माता कालरात्रि
– आठौं दिन- माता महागौरी
– नवौं दिन- माता सिद्धिदात्री
कुन स्वरूपको कस्तो गुण ?
– माता शैलपुत्री- माता दुर्गाको यो स्वरूप धैर्य र सहनशीलताको प्रतीक हो ।
– माता ब्रह्मचारिणी- यो स्वरूप संयम र तपको प्रतीक हो । कसरी मुश्किल समयमा संयम राख्न सकिन्छ भनेर यो स्वरूपले हामीलाई सिकाउँछ ।
– माता चन्द्रघण्टा- यो भक्ति र सेवाको स्वरूप हो । यसले हामीलाई समाजप्रति सेवाभाव राख्न सिकाउँछ ।
– माता कुष्माण्डा- यो स्वरूप साहसको प्रतीक हो । माता दुर्गाले राक्षस महिषासुरलाई पराजित गर्न आफ्नो साहस र बल देखाएकी थिइन् ।
– स्कन्दमाता- यो माता दुर्गाको प्रेम, दया, करुणा र पालनपोषण स्वरूप हो ।
– माता कात्यायनी- माता दुर्गाको यो स्वरूप धर्म र न्यायको प्रतीक हो ।
– माता कालरात्रि- माता दुर्गाको यो स्वरूपले हामीलाई नकारात्मक वस्तु त्याग्न र कठिनाइहरूको सामना गर्न शक्ति प्रदान गर्छ ।
– माता महागौरी- यो पवित्रताको प्रतीक हो । यो स्वरूपले हामीलाई जीवनमा शुद्धता र पवित्रता कायम राख्न प्रेरणा दिन्छ ।
– माता सिद्धिदात्री- माता दुर्गाको यो स्वरूप आत्मसमर्पणको प्रतीक हो ।