सुनसरी- सप्तकोशी नदीमा असारदेखि बन्द भएका जेटबोट आजदेखि पुनः सञ्चालनमा आएका छन्।

बराहक्षेत्र नगरपालिका–१ चतराघाटदेखि कोप्चेसम्म हिउँदको समयमा चल्दै आएका जेटबोट ‘रकेट’ले आजदेखि पुनः सञ्चालनमा ल्याएको हो।

सप्तकोशी किनारस्थित चतराघाटबाट जेटबोट सञ्चालन हुने मरिन एन्ड रिसोर्ट जेटबोटका मालिक नवीन पौडेलले बताए। दशैं–तिहार लक्षित गरी यात्रुहरूलाई सहजताका साथ आफ्नो गन्तव्यस्थल पुग्न रकेट जेटबोट सञ्चालनमा ल्याइएको उनले बताए।

आज शुक्रबार चतराघाटबाट कोप्चेसम्म ३ वटा इन्जिन जडित रकेट जेटबोट परीक्षण गरिएको थियो। परीक्षण सफल भएपछि आजैदेखि सेवालाई निरन्तरता दिइएको पौडेलले बताए।

उनका अनुसार चतराघाटबाट कोप्चेसम्मका लागि भाडादर जनही ७०० रुपैयाँ कायम गरिएको छ।

चतराबाट जेटबोट सञ्चालन भएपछि भोजपुरको दक्षिणी क्षेत्र, धनकुटाका सिम्ले, अखुवाटार, त्रिवेणी, साङ्मालगायत ठाउँमा आउजाउ तथा खाद्यान्न ढुवानी सहज हुने छ।

बराहक्षेत्र मरिन एन्ड रिसोर्ट जेट बोटका सञ्चालक पौडेलका अनुसार १५ असारयता नदीको पानीको सतह बढेपछि जेटबोट बन्द भएका थिए। त्यसयता भोजपुर र धनकुटाका बासिन्दाले जोखिम मोलेर पैदल यात्रा गर्दै आउनुपरेको थियो।

बराहक्षेत्र मन्दिरबाट अकरे भीरको बाटो हुँदै कठिन पैदल यात्रा गर्दा करिब तीन घण्टामा मात्र सिम्ले पुग्न सकिन्छ। जेटबोटबाट यो यात्रा करिब १५ मिनटको मात्र हो।

‘नेपालीहरूको महान चाड दशैंमा आफ्नो थातथलो फर्किने यात्रु बढी हुन्छन्,’ पौडेलले भने, ‘उहाँहरूलाई सुरक्षित साथ आ–आफ्नो गन्तव्यसम्म पुग्नका लागि ३ वटा इन्जिन जडित रकेट जेट बोट‌ ल्याएका छौं।’

सप्तकोशी नदीमा हिउँदको समयमा बराहक्षेत्र मरिन एन्ड रिसोर्ट, सप्तकोशी टुरिजम एन्ड वाटर ट्रान्सपोर्टेसन, नेपाल रिभर ट्रान्सपोर्ट प्रालि, दन्तकाली जल यातायात, दन्तकाली जल यातायात प्रालि, बराहक्षेत्र जल यातायात तथा पर्यटन सेवा प्रालि गरी चारवटा कम्पनीले तीनवटा लामो दूरीका र चारवटा छोटो दूरीका जेटबोट सञ्चालन गर्दै आएका छन्।

पानीको बहाव कम भएपछि अन्य जेटबोटहरू पनि नियमित सञ्चालनमा आउने कोशी एडभेन्चर सञ्चालक समितिका सचिव शिव थापाले जानकारी दिए।