युक्रेनमा रुसले आक्रमण गरेपछि स्विडेन र फिनल्यान्डले नेटोमा सहभागी हुने विषयलाई गम्भीरताका साथ लिएको नेटोका अधिकारीहरूले जानकारी दिएका छन्। यो निर्णयले मस्को थप आक्रोशित बन्ने सम्भावना छ।
अमेरिकी विदेश मन्त्रालयका अधिकारीका अनुसार यो साता सम्पन्न भएको नेटो विदेश मन्त्रीस्तरीय बैठकमा यो विषयले प्रवेश पाएको थियो। बैठकमा स्विडेन र फिनल्यान्डका विदेश मन्त्रीहरू पनि सहभागी भएका थिए। यदि ती मुलुक नेटोमा सहभागी भए भने पुटिनको उद्देश्यमा ठूलो धक्का लाग्नेछ। नेटोको पूर्वी विस्तार रोक्न युक्रेनमाथि आक्रमण गरेको दलिल पेस गरेको रुसले थप दुई नेटो छिमेकी सामना गर्नुपर्ने हुनसक्छ।
फिनल्यान्ड र रुसबीच लामो सिमाना जोडिएको छ। सन् १९१७ अघि फिनल्यान्ड रुसी साम्राज्यको हिस्सा थियो। फिनल्यान्डकी प्रधानमन्त्री सन्ना मरिनले नेटो सदस्यता लिने विषयमा ‘आगामी केही साताभित्र’ संसदमा बहस हुने जानकारी दिएकी छन्। बहस संयमित हुने कुरामा जोड दिँदै मरिनले परिस्थ्तिि निक्कै गम्भीर भएकाले बहसलाई टुंगोमा पु¥याउन धेरै समय भने नलगाउने बताइन्।
यस्तै स्विडिस प्रधानमन्त्री म्याडेलेना एन्डरसनले मार्च अन्तिम साता एक टेलिभिजन अन्तरवार्तामा नेटो सदस्यताको सम्भावनालाई इन्कार गरिनन्। स्विडेनले मे अन्तिमसम्ममा सकिने गरी सुरक्षा नीतिको समीक्षा गर्दैछ र त्यसलगत्तै सरकारले धारणा प्रष्ट्याउनेछ। अमेरिकाका लागि फिनिस राजदूत मिक्को होटालाले दुई देशले यससम्बन्धमा नजिक रहेर सहकार्य गरिरहेको बताए।
फिनल्यान्ड र स्विडेन नेटोमा सहभागी हुने बहस चर्केपछि क्रेमलिनले बिहीबार प्रतिक्रिया दिने क्रममा दुई मुलुकले नेटोको सदस्यता लिएमा पश्चिमतर्फको हिस्सामा सुरक्षास्थिति मजबुत बनाउनुपर्ने बताएको छ।
शुक्रबार नै फिनल्यान्डमाथि दुई रुसी साइबर आक्रमण भयो भने उसको हवाई क्षेत्रमा रुसी जहाजले उडान भरे। यस परिप्रेक्ष्यमा इतिहासलाई समेत ख्याल गरेर केही विज्ञले फिनल्यान्डले नेटोको सदस्यताका लागि प्रक्रिया शुरु गरेमा ऊमाथि आक्रमण हुनसक्ने चिन्ता पनि व्यक्त गरेका छन्।
फिनिस अधिकारीहरूले आफूहरू यसबारेमा सचेत रहेको बताएका छन्। सदस्यताको आवेदन दिएदेखि अनुमोदन नभएसम्म केही मुलुकले सघाउने संकेत गरेको ती अधिकारीले बताए। नेटोका महासचिव जेन्स स्टोल्टेनवर्गले यही साता ‘अन्तरिम कालको अनुरक्षा सम्बोधन गर्न केही मार्ग भेटिने’ आशा व्यक्त गरेका छन्।
स्टोल्टेनवर्गले स्विडेन र फिनल्यान्डले ‘नेटोको सदस्यताका लागि आवश्यक मापदण्ड पूरा गर्ने भएकाले तिनले चाहेमा सजिलै गठबन्धनमा जोडिन सक्ने’ बताएका छन्। फिनल्यान्डका अधिकारीहरूले पनि फिनल्यान्ड ‘अहिले नै नेटो सदस्यजस्तो’ रहेको प्रतिक्रिया दिने गरेका छन्। यी दुई मुलुक र नेटोबीचमा पहिलेदेखि विभिन्न तहमा गुप्तचर सूचना आदानप्रदान हुने गरेको छ।
फिनल्यान्ड र स्विडेनले नेटोको सदस्य भए भने तिनले संगठनमा महत्त्वपूर्ण योगदान गर्न सक्ने युरोपियन अधिकारीको आशा छ। फिनल्यान्डले पहिलेदेखि बोइङ एफ–ए–१८एस सञ्चालन गरिरहेको छ भने थप ६४ वटा लोकहिद मार्टिन एफ–३५एस आउँदै छन्। केही अधिकारीले स्विडेन र फिनल्यान्ड नेटोमा सहभागी भए भने यो पुटिनले युरोपेली सुरक्षा मजबुद बनाउन गरेको सबैभन्दा ठूलो योगदान हुने बताएका छन्।