बेलायती प्रधानमन्त्री बोरिस जोन्सनले युक्रेनको सर्प्राइज भ्रमण गरेका छन्। भ्रमण क्रममा उनले युक्रेनी राष्ट्रपति भोलोदिमिर जेलेन्स्कीसँग रुसविरुद्ध लड्न १२० बख्तरबन्द गाडी र एन्टी-सिप मिसाइल दिने प्रतिबद्धता जनाएका छन्।
एक्कासी युक्रेनको राजधानी किभ पुगेका जोन्सनले त्यहाँका सडकमा राष्ट्रपति जोन्सनसँग यात्रा गरेका थिए।
बेलायती प्रधानमन्त्री कार्यालय ‘डाउनिङ स्ट्रिट’ले जारी गरेको विज्ञप्तिअनुसार युक्रेनमा जेलेन्स्की अटल नेतृत्व र युक्रेनी नागरिकको सहायताका लागि बख्तरबन्द गाडी र मिसाइल दिइन लागेको हो। युक्रेनका नागरिकको साहसका अघिल्तिर रुसी राष्ट्रपति भ्लादिमिर पुटिनले घुँडा टेकेको ‘डाउनिङ स्ट्रिट’को भनाइ छ।
भ्रमणको दौरान जोन्सनले युक्रेनलाई विश्व बैंकको तर्फबाट ५० करोड डलर उपलब्ध गराउने बाचा पनि गरेका छन्। त्यसका लागि बेलायती संसदको मञ्जुरी आवश्यक हुन्छ।
हालसम्म बेलायतले युक्रेनलाई एक अर्ब डलर ऋण उपलब्ध गराउने ग्यारेन्टी दिएको छ। त्यसबाहेक युक्रेनबाट हुने आयातमा त्यहाँका उत्पादनलाई कर छुट दिने घोषणा पनि बेलायतले गरेको छ।
‘युक्रेनले युद्धको कठिनाइलाई पन्छाउँदै रुसी सेनालाई राजधानी किभबाट पछाडि हटाइदिएको छ। बेलायत यस लडाईंमा युक्रेनको साथ खडा छ,’ जोन्सनले भने।