प्रधानमन्त्री शेरबहादुर देउवाले सत्ता सम्हालेयता दोस्रोपटक गैरसांसदलाई मन्त्री बनाएका छन्। अधिवक्ता गोविन्द बन्दीलाई बिहीबार न्याय, कानून तथा संसदीय मामिला मन्त्री नियुक्त गरिएको हो।
यसअघि गैरसांसद गैरसांसद गजेन्द्र हमाललाई उद्योग, वाणिज्य तथा आपूर्ति मन्त्री नियुक्त गरेपछि विवाद भएको थियो। विवादबीच हमालले राजीनामा दिएका थिए।
हमालले राजीनामा दिएपछि रिक्त रहँदै आएको उद्योग, वाणिज्य तथा आपूर्ति मन्त्रीका रूपमा दिलेन्द्रप्रसाद बडुलाई तोकिएको छ। अधिवक्ता बन्दीलाई न्याय, कानून तथा संसदीय मामिला मन्त्री नियुक्त गरिएपछि बडुलाई रिक्त उद्योग, वाणिज्य तथा आपूर्ति मन्त्रालयको जिम्मेवारी दिइएको छ।
राष्ट्रपति कार्यालयले भरखरै सूचना प्रकाशित गरी गोविन्दप्रसाद शर्मा कोइराला (गोविन्द बन्दी)लाई मन्त्री नियुक्त गरिएको जानकारी दिएको छ। र, बडुलाई उद्योग, वाणिज्य तथा आपूर्ति मन्त्रालयको जिम्मेवारी तोकिएको सूचनामा उल्लेख छ। नवनियुक्त मन्त्री बन्दीलाई बिहीबार नै सपथ ग्रहण गराइने भएको छ।
कानूनविद् बन्दी अहिलेको सत्ता गठबन्धनका कानूनी सल्लाहकारको भूमिकामा रहँदै आएका छन्। तत्कालीन प्रधानमन्त्री केपी ओलीले हठात् प्रतिनिधिसभा विघटन गरेपछि त्यसविरुद्ध रिट लेख्नेदेखि केही समयअघि संघीय संसदबाट पारित भएको एमसीसीको व्याख्यात्मक घोषणा तयार पार्नेसम्मको काममा बन्दी सहभागी थिए। प्रतिनिधिसभा विघटनको विपक्षमा उनले सर्वोच्च अदालतमा वकालत गरेका थिए।