दूरसञ्चार प्राधिकरणले मोबाइल सेवाको सिम र रिमकार्ड बिक्री वितरणमा कडाइ गर्न सेवा प्रदायक कम्पनीहरूलाई निर्देशन दिएको छ।
प्राधिकरणले शुक्रबार सूचना जारी गरी यस्तो निर्देशन दिएको हो। सेवा प्रदायक कम्पनीहरूले सिमकार्ड बिक्री वितरण गर्दा भर्नुपर्ने फारम रीतपूर्वक नभराएको तथा कागजात रुजु नगरी सिमकार्ड बिक्री गरेकोे गुनासो आएको प्राधिकरणको भनाइ छ। र, सबै प्रक्रिया पूरा गरेर मात्र बिक्री वितरण निर्देशन दिएको छ।
‘मोबाइल सेवा प्रदायकका सिम र रिमकार्ड बिक्री वितरण गर्दा ग्राहकले भर्नुपर्ने फारम (केवाईसी) रीतपूर्वक नभरी र नियमानुसार कागजात रुजु नगरी सेवा प्रदायकबाट वितरण भइरहेको भन्ने बुझिन आएको छ। मोबाइल सेवा प्रदायकले प्राधिकरणले दिएको निर्देशन र नियमानुसार ग्राहकलाई रीतपूर्वक फारम भर्न लगाई र विवरण रुजु गरेर मात्र बिक्री वितरण गर्नुहुन अनुरोध छ,’ प्राधिकरणकोसूचनामा उल्लेख छ।
यस्तै, ग्राहकलाई पनि आफ्नो वास्तविक विवरणको आधारमा मात्र सिम र रिमकार्ड खरिद गर्न प्राधिकरणले आग्रह गरेको छ। निर्देशनबमोजिम खरिद बिक्री नभएको पाइएमा प्रचलित कानूनअनुसार कारवाही गरिने प्राधिकरणले जनाएको छ।