नेपालको मौलिक खाना, संस्कृति र गन्तव्य प्रबर्द्धनका लागि ‘बीबीसी मास्टर सेफ’ सन्तोष साहसहितको टोली आज नेपाल आउँदैछ। प्यासिफिक एसिया ट्राभल एशोसिएशन (पाटा) नेपाल च्याप्टरको निमन्त्रणमा ‘बीबीसी मास्टर सेफः द प्रोफेसनल २०२०’ का फाइनालिस्टहरूलाई नेपाल ल्याउन लागिएको हो।
बिहीबार नेपाल आइपुग्ने टोलीलाई त्रिभुवन अन्तर्राष्ट्रिय विमानस्थलमा स्वागत गरिने तयारी भएको पाटा नेपाल च्याप्टरले जनाएको छ। कोभिड–१९ महामारीपछिको पर्यटन पुनरुत्थान अभियानअन्तर्गत सेफ साहसहितको टोलीलाई नेपाल बोलाएर मौलिक खाना, संस्कृति र गन्तव्य प्रबर्द्धनमा सहभागी गराइने पाटा नेपाल च्याप्टरका प्रमुख कार्यकारी अधिकृत सुरेशसिंह बुडालले बताए।
चर्चित सेलिब्रेटी सेफलाई नेपाल भ्रमण गराई गन्तव्यको प्रचारप्रसार तथा मौलिक खाना र संस्कृतिको प्रबर्द्धन गर्न पाटाले गरेको पहलले महामारीपछिको पर्यटन पुनरुत्थानमा विशेष सहयोग हुने विश्वास पाटाको छ।
सेफ साहको साथमा सेफ एलेक्स, सेफ बार्ट र सेफ फिलिपालगायतको टोली नेपालमा विभिन्न स्थानमा पर्यटन प्रबर्द्धनमा सहभागी हुनेछन्। उक्त टोली १० दिनसम्म विभिन्न प्रचारात्मक गतिविधिमा संलग्न हुनेछ। ८ अप्रिलमा पोखरा, ९ अप्रिलमा काठमाडौं र १० अप्रिलमा जनकपुरमा हुने कार्यक्रममा उक्त टोली सहभागी हुनेछ। जनकपुरमा आयोजना हुने ‘मिथिला खाना तथा रेसिपी’ विषयक कार्यक्रममा सहभागी हुनेछ। उक्त टोली ११ अप्रिलमा काठमाडौंमा आयोजना हुने पाटा नेपाल च्याप्टरको ४५ औँ वार्षिक साधारणसभाको औपचारिक समारोहमा सहभागी हुनेछ।
यस्तै, १२ अप्रिलमा काठमाडौंमा ‘फाइनडाइनिङ’ कार्यक्रममा सहभागी भई १३ अप्रिलमा लुक्ला जानेछ। र, सगरमाथा आधार शिविर र कालापत्थर भ्रमण गर्नेछ। उक्त टोली लुक्लाबाट फर्केपछि १५ अप्रिलमा बर्दिया जानेछ। बर्दियामा थारू संस्कृति तथा खानासम्बन्धी प्रबर्द्धनात्मक कार्यक्रमसहित मास्टरसेफद्वारा नेपालको खानाको लोभ र रहस्य पत्ता लगाउन वाइल्ड स्पाइसेस हन्टिङ कार्यक्रम आयोजना गरिनेछ। १७ अप्रिलमा सेफ एसोसिएसनको कुकिङ प्रतियोगितामा सहभागी भएर सेफ टोली फर्किनेछ। राससबाट