नयाँदिल्ली- भान्सामा सरसफाइका लागि प्रयोग गरिने स्क्रबमा शौचालयमा भन्दा बढी किटाणु पाइएका छन्। विज्ञहरूले लामो समय किचनमा स्क्रब प्रयोग नगर्न सुझाएका छन्।
जर्म्स, भाइरस र ब्याक्टेरियाबाट छुटकारा पाउन किचनलाई दैनिक सरफाइ गर्नुपर्ने विज्ञहरूको सुझाव छ। त्यही किचनको सरसफाइमा स्पन्ज र स्क्रब अत्यधिक प्रयोग हुन्छन्। सफाइ गर्ने साधन नै फोहोर भएपछि सफाइ गर्नुको औचित्य रहँदैन।
मसाला राख्ने स्ल्याब, डिब्बाहरू, ग्यास चुलो र भाँडाकुँडा सफा गर्न स्क्रबको प्रयोग हुन्छ। तर, त्यही स्क्रब लामो समय प्रयोग गरियो भने शौचालयमा भन्दा बढी किटाणु त्यसैले आफूसँग संग्रह गरिदिन्छ। र, त्यो रोगको खानी बन्न पुग्छ।
सन् २०१७ मा जर्मनीको फर्टवागन युनिभर्सिटीका शोधार्थीहरूले यसबारे अध्ययन गरेका थिए। र, लामो समय प्रयोग गरिएका स्पन्ज र स्क्रबमा शौचालयमा भन्दा बढी हानीकारक किटाणु फेला पारेका थिए।
लामो समय प्रयोग गरिएको स्क्रबले फुड पोइजनिङ, पेट दुखाइ, वान्ता, छालामा इन्फेक्सन, श्वासप्रश्वासको समस्या र ज्वरोजस्ता स्वास्थ्य जटिलता निम्त्याउन सक्छन्।
राखौं यी कुरामा ध्यान
– उम्लिएको पानीमा साबुन या डिटर्जेन्ट प्रयोग गरेर नियमित स्पन्ज र स्क्रबको सफाइ गरौं
– राम्रोसँग धोएर स्पन्ज र स्क्रबलाई घाममा सुकाऊँ
– स्पन्जलाई सधैं साबुन-पानीमा भिजेको अवस्थामा नराखौं
– स्पन्ज र स्क्रबलाई बढीमा २ सातामा परिवर्तन गरौं