मेलबर्न- एक नयाँ अध्ययनले निद्रामा हुने ‘डिस्टर्ब’का कारण डाइमेन्सियाको उच्च जोखिम रहने पत्ता लगाएको छ।
अझ निद्राको औषधिको उपयोग र छिटो सुत्ने बानीले पनि डाइमेन्सियाको जोखिम उत्पन्न हुने अध्ययनको निष्कर्ष छ। १० वर्ष लगातार निद्रामा अवरोध भयो भने मनोभ्रम विकसित हुने निष्कर्ष पनि शोधकर्ताले दिएका छन्।
अमेरिकाका शोधार्थीले बयस्क र ज्येष्ठ नागरिकबीच देशभरको नमूना संकलन गरेर यो अध्ययन गरेका थिए। यो निद्रामा हुने गडबडीले निम्त्याउने स्वास्थ्य जटिलताबारे अमेरिकामा गरिएको पहिलो बृहत अध्ययन हो।
स्टेट युनिभर्सिटी अफ न्युयोर्क अपस्टेट मेडिकल युनिभर्सिटीका सार्वजनिक स्वास्थ्य वैज्ञानिक रोजर वोङले भने, ‘निद्रा मनोभ्रमका नतिजा देखेर हामी हैरान थियौं। त्यसैले यस विषयमा अध्ययन गरेका हौं।’
शोधकर्ताहरूले नेसनल हेल्थ एन्ड एजिङ ट्रेन्ड्स स्टडीअन्तर्गत ६५ वर्षभन्दा अधिक आयुका ६ हजार २८४ ज्येष्ठ नागरिकलाई अध्ययनमा सहभागी गराएका थिए। समुदायमा बस्ने उनीहरूको डाइमेन्सिया जाँच गरिएको थिएन।
अध्ययनबाट तीमध्ये ५१ प्रतिशतमा डाइमेन्सियाको अत्यधिक जोखिम देखिएको थियो। अध्ययनमा सहभागी ज्येष्ठ नागरिकमध्ये ३० प्रतिशतमा डाइमेन्सिया देखिएको थियो। जब उनीहरूको अनिद्रा दूर गरियो, डाइमेन्सिया ४० प्रतिशतले घट्यो।
अबेर रातिसम्म जागा रहने बानीले गम्भीर स्वास्थ्य जटिलता उत्पन्न हुने निष्कर्ष पनि शोधकर्ताले निकालेका छन्। रिसर्च फेलो मार्गरेट एनी लभियरको भनाइमा अनिद्रामा रहने व्यक्तिहरूले तत्काल जीवनशैलीमा परिवर्तन गरिहाल्नु पर्छ। अन्यथा ध्यान केन्द्रित नहुनेजस्ता स्वास्थ्य समस्या देखिन थाल्छन्।
खासगरी, बयस्क र ज्येष्ठ नागरिकमा विभिन्न प्रकारका चिन्ताले गहिरो निद्रा लिन दिँदैनन्। त्यसैले ओछ्यानमा जानुअघि नै उक्त उमेर समूहले जीवनका दैनन्दिन समस्याहरूलाई मनबाट हटाउन जरुरी रहेको शोधकर्ताले सुझाव दिएका छन्।
साइन्स अलर्ट डट कमबाट