काठमाडौँ । बेनी–दरबाङ सडक खण्डअन्तर्गत म्याग्दीको बेनी नगरपालिका ६ डम्मरामा रहेको दुई सवारी साधनमा आगजनी भएको छ । आज बिहान करिब ४ बजे सडकमा पार्किङ गरिएका भ्यान र ट्याक्सीमा अज्ञात व्यक्तिबाट आगजनी गरिएको बताइएको छ ।

सडकमै पार्किङमा रहेका ध १ ज ९८६ नं को भ्यान र ध १ ज ७२६ नं को ट्याक्सीमा आगजनी गरिएको जिल्ला प्रहरी कार्यालयका प्रहरी निरीक्षक वीरेन्द्र गुरुङले जानकारी दिए । उनका अनुसार सवारी साधनमा आगलागी गर्ने व्यक्तिको पहिचान भएको छैन ।

बुधबार बेलुका करिब ७ बजे दुवै सवारी साधन एक आपसमा ठोक्किएर सामान्य दुर्घटना भएको थियो । घटनापछि भएको क्षति दुवै पक्षले एकआपसमा व्यहोर्ने गरी मिलापत्र गराइएको थियो ।

दुवै सवारी साधनका धनी स्थानीयवासी भएकाले तिनलाई डम्मरास्थित सडकमै पार्किङ गरिएकामा आगलागी भएपछि घटना रहस्यमय बनेको छ ।