काठमाडौँ । नेकपा एमालेका अध्यक्ष केपी शर्मा ओलीले सत्ता गठबन्धनलाई एक–एक किलोको ५ वटा ढक भएको बताएका छन् । बुधबार भक्तपुरको सूर्यविनायकस्थित सूर्यविनायक हरित कृषि तथा थोक बजारको उद्घाटन गर्दै उनले गठबन्धन एक–एक किलोका ५ किलो र एमाले एक क्विन्टलको ढक बराबर रहेको बताएका थिए ।

‘नेकपा एमाले क्विन्टलको ढक हो, एक्लै एमालेसँग लड्न अब कसैले नसोचे र नचिताए हुन्छ’, ओलीले भने, ‘त्यसकारण उहाँहरूले गठबन्धन गरेर आउनुपर्छ भनेर भनिरहनुभएको छ ।’

उनले सजिलो नभएकाले स्थानीय तह निर्वाचनका लागि उम्मेदवार मनोनयन गर्नसमेत दुई दिनको समय राखेको भन्दै आपत्ति जनाए । ‘त्यही भएर मनोनयन गर्ने समय दुई दिन राखेका हुन्, एक हप्ता गराएपनि के हुन्छ ? मनोनयन नै हुन्छ’, उनले भने ।