काठमाडौं- उदयपुर चौदण्डीगढी नगरपालिका-१० देबधारस्थित सडकमा स.१ ह ३१९२ नम्बरको टेम्पोलाई हाल नम्बर नखुलेको सवारी साधनले आइतबार दिउँसो ठक्कर दिँदा टेम्पोमा सवार चौदण्डीगढी नगरपालिका-६ बेल्टार बजार बस्ने ७० वर्षीय डण्डीराम तिम्सिनाको मृत्यु भएको छ । दुर्घटनामा गम्भीर घाइते भएका उनको चौदण्डीगढी नगर अस्पतालमा उपचारको क्रममा मृत्यु भएको हो । साथै दुर्घटनामा घाइते भएका टेम्पो चालक समेत २ जनाको न्यूरो अस्पताल विराटनगरमा उपचार भइरहेको छ । ठक्कर दिने सवारी साधनको प्रहरीले खोजी गरिरहेको छ ।
यसैगरी उदयपुर कटारी नगरपालिका-११ हर्देनीस्थित सडकमा प्रदेश १-०७-००१ ज ००११ नम्बरको गाडी अनियन्त्रित भई आइतबार दिउँसो दुर्घटना हुँदा गाडीमा सवार ओखलढुंगा सुनकोशी गाउँपालिका-४ च्यानम बस्ने ५४ वर्षीय खेम बहादुर कार्कीको मृत्यु भएको छ । दुर्घटनामा गम्भीर घाइते भएका उनको ट्रमा सेन्टर काठमाडौंमा उपचारको क्रममा मृत्यु भएको हो । दुर्घटनामा घाइते भएका मध्ये १० जना उपचार पश्चात डिस्चार्ज भएका छन् भने ३ जनाको न्यूरो अस्पताल विराटनगरमा उपचार भइरहेको छ ।
चितवन कालिका नगरपालिका-६ स्थित सडकमा बा.७१ प ९५९५ र ना.३२ प ६५३३ नम्बरको मोटरसाइकल एकआपसमा ठक्कर खाई आइतबार साँझ दुर्घटना हुँदा बा.७१ प ९५९५ नम्बरको मोटरसाइकल चालक रत्ननगर नगरपालिका-१२ बस्ने १९ वर्षीय प्रबिन परियारको मृत्यु भएको छ । दुर्घटनामा गम्भीर घाइते भएका उनको भरतपुर अस्पताल चितवनमा उपचारको क्रममा मृत्यु भएको हो । ना.३२ प ६५३३ नम्बरको मोटरसाइकलका चालकलाई प्रहरीले नियन्त्रणमा लिएको छ ।