कैलाली- धनगढीको निसर्ग अस्पतालमा कार्यरत डाक्टर ओमप्रकाश भट्टलाई कारबाही गर्ने सहमति भएको छ। उपचारको क्रममा युवतीको मृत्यु भएपछि अस्पतालले डाक्टर भट्टलाई निलम्बन गरेको हो ।
अस्पताल र आफन्तको सहमति पछि युवतीको शव मंगलबार साझ पोस्टमार्टमका लागि सेती प्रादेशिक अस्पताल लगिएको प्रहरीले जानकारी दिएको छ ।
डाक्टर भट्टले गलत औषधी प्रयोग गर्दा धनगढी उपमहानगरपालिका १ की २२ वर्षीया लक्ष्मी जोशीको मंगलबार बिहान ३ बजेतिर मृत्यु भएको आफन्तले आरोप लगाएका छन ।
अस्पतालले डाक्टर भट्टलाई निलम्बन गरिसकेको छ । त्यस्तै, मेडिकल काउन्सिलमा कारबाहीका लागि सिफारिस पत्र पठाउने सहमति भएको जनाइएको छ ।
डाक्टरको लापरबाहीले गर्दा नै बिरामीको मृत्यु भएको भन्दै आफन्तले मंगलबार दिनभर अस्पताल परिसरमा आन्दोलन गरेका थिए।
सामान्य पेट दुखेर सोमबार राति १२ बजे अस्पताल भर्ना भएकी उनको तीन घण्टाको फरकमा उपचारको क्रममा मृत्यु भएको थियो।