काठमाडौँ । परराष्ट्रमन्त्री डा. नारायण खड्का र नेपाल भ्रमणमा रहेका चिनियाँ विदेशमन्त्री वाङ यीबीच आज दिउँसो तीन बजे बैठक बस्ने भएको छ । सिंहदरबारस्थित प्रधानमन्त्री कार्यालयमा बैठक बस्ने परराष्ट्र मन्त्रालयले जनाएको हो ।

बैठकमा नेपालको नेतृत्व परराष्ट्रमन्त्री डा. खड्का र चीनको नेतृत्व चिनियाँ विदेशमन्त्री वाङले गर्ने भएका छन् । बैठकमा दुई देशको सम्बन्धका सबै आयाममा छलफल हुने भएको छ ।

बैठकमा दुई देशबीच केही सम्झदारी तथा सम्झौता पत्रमा हस्ताक्षर हुने भएको छ । बैठक सकिएसँगै चिनियाँ विदेशमन्त्रीले आजै प्रधानमन्त्री शेरबहादुर देउवासँग भेट वार्ता गर्ने भएका छन् ।