११ दिनको रस्साकस्पछि भारतीय जनता पार्टी (भाजपा)ले आखिरमा पुष्करसिंह धामीलाई नै उत्तराखण्डको मुख्यमन्त्री पद सुम्पिने निर्णय गर्यो। धामीले मुख्यमन्त्रीको सपथ लिएपछि उनको नयाँ मन्त्रिपरिषद्ले पनि सपथ लिने समयतालिका छ। सपथग्रहण समारोह देहरादूनको परेड ग्राउन्डमा हुनेछ। भाजपाले सोमबार धामीलाई पुनः उत्तराखण्डको मुख्यमन्त्री बनाउने निर्णय गरेको थियो।
देहरादुनमा बसेको दलको बैठकपछि रक्षामन्त्री राजनाथ सिंहले यो घोषणा गरेका हुन्। भाजपाले धामीको नेतृत्वमा राज्यको चुनाव लडेको थियो। र, पार्टीले राज्यको ७० सिटमध्ये ४७ मा जित्यो। स्वयं धामीले भने उनको सिट बचाउन सकेनन्। हारेको व्यक्ति मुख्यमन्त्री भएपछि ६ महिनाभित्र राज्यको कुनै सिटमा चुनाव जितेर विधायक बन्नु पर्नेछ। विगतमा पनि भारतका विभिन्न राज्यमा यस्तो अभ्यास भएको छ।
केही समयअघि मात्रै पश्चिम बंगालको मुख्यमन्त्री ममता बेनर्जीको पार्टीले राज्यमा महत्त्वपूर्ण जित हासिल गर्दा उनले भने हारेकी थिइन्। तथापि, उनी नै मुख्यमन्त्री चुनिइन्। पछि उनले अर्को निर्वाचन क्षेत्रबाट उमेद्वारी दिएर जित हासिल गरिन्।
भाजपाले उत्तराखण्डका अतिरिक्त गोवा र मणिपुरमा पनि पुरानै नेतालाई मुख्यमन्त्री पदमा दोहो¥याउने निर्णय गरेको छ। अब गोवामा प्रमोद सावन्त मुख्यमन्त्री बन्नेछन् भने मणिपुरमा वीरेन सिंहले आइतबार नै मुख्यमन्त्री पदको सपथ लिइसकेका छन्।
अहिलेको निर्णय सन् २०२४ को आम निर्वाचनलाई मध्यनजर राखेर लिएको जस्तो देखिन्छ। धामी र सावन्त दुवैलाई चुनावको केहीअघि मात्र मुख्यमन्त्री बनाइएको थियो। उनीहरूले नेतृत्व गरेका राज्यमा पार्टीले राम्रो मत ल्याएको छ। भाजपाले उत्तराखण्डका ७० राज्यसभा सिटमा ४७ सिट जित्यो भने गोवाको कुल ४० सिटमा २० भाजपाले जितेको छ।
भारतीय पत्रिका द हिन्दूले गोवा र उत्तराखण्डमा नेतृत्व परिवर्तन नगर्ने निर्णय लिएर भाजपाले दुवै राज्यमा पार्टीको आन्तरिक शक्ति सन्तुलन स्थिर राख्न खोजेको उल्लेख गरेको छ।