काठमाडौँ । युक्रेनका राष्ट्रपति भोलोदिमिर जेलेन्स्कीले रुससँग भएको युद्धमा वार्ता असफल भए ‘तेस्रो विश्व युद्ध’ हुने चेतावनी दिएका छन्।
आइतबार अमेरिकी न्युज च्यानल सिएनएनसँग कुरा गर्दै जेलेन्स्कीले तेस्रो विश्व युद्ध हुने चेतावनी दिएका हुन्। जेलेन्स्कीले आफू रुसी राष्ट्रपति भ्लादिमिर पुटिनसँग वार्ता गर्न तयार भएको बताएका थिए। उनले यो युद्धको अन्त्यका लागि वार्ता नै एक मात्र उपाय भएको बताए।
जेलेन्स्कीले भने, ‘मलाई लागिरहेको छ कि, हामी वार्ताका लागि हरेक समय र अवसरको उपयोग गर्न चाहन्छौँ।’ हालै जेलेन्स्कीले युक्रेनले रुस प्रायोजित पृथकतावादी क्षेत्रहरूलाई स्वतन्त्र क्षेत्रको रूपमा मान्यता दिनु पर्ने कुनै पनि सम्झौतालाई स्वीकार नगर्ने स्पष्ट पारेको छ।
युक्रेनी राष्ट्रपति जेलेन्स्कीले आफ्नो देश नाटो संगठनको हिस्सा भएको भए ‘यो लडाइँ सुरु हुने थिएन’ भन्ने कुरा व्यक्त गरेका थिए।
उनले भने, ‘हामी नेटोका सदस्य गठबन्धनमा शामिल गराउन चाहन्छौँ।’ उनले युद्धमा दैनिक मानिसहरूले आफ्नो ज्यान गुमाइरहेको बताए। एजेन्सी
