काठमाडौँ । रुसले युक्रेनमाथि हमला गरेको करिब तीन हप्ता पुग्न लागेको छ। दुई देशबीचको युद्धमा ठूलो धनजनको क्षति भइसकेको छ।

युक्रेनको तुलनामा शक्तिशाली मानिएको रुसले करिब १४ हजार सैनिक गुमाएको दाबी गरिएको छ। हजारौँ रुसी सैनिकहरू घाइते भएका छन्।

बेलारूसका समाचार संस्थाका अनुसार युक्रेनको हमलाका कारण रुसी सैनिकहरू हताहती भएका छन्। घाइते भएका रूसी सैनिकहरू बेलारूसको अस्पतालमा उपचार गरिरहेका छन्।

घाइते रूसी सैनिकको उपचारका कारण बेलारूसका अस्पतालहरू भरिएका छन्। यस्तै, रूसी सैनिकको मृतक संख्या कम देखाउन युद्धमा मारिएका सैनिकको शव ट्रेनमा राखेर बेलारूस लगिएको रिपोर्टमा दाबी गरिएको छ।

यसैबीच, युक्रेनी राष्ट्रपति भोलोदिमिर जेलेन्स्कीले चाँडोभन्दा चाँडो दुई देशबीच वार्ता हुनु पर्ने बताउँदै आएका छन्। जेलेन्स्कीले भिडियो म्यासेजमार्फत रुससँग सीधा वार्ता गर्न आफू तयार रहेको बताएका छन्।

तर, टर्कीका राष्ट्रपतिका चिफ एडभाइजरले रुसी राष्ट्रपति भ्लादिमिर पुटिन तत्काल वार्ता गर्न तयार नभएको दाबी गरेका छन्। एजेन्सी