नयाँदिल्ली- तपाईंले घर या अफिसमा प्रयोग गर्ने एसीबाट चिसो-तातो हावासँगै नमिठो गन्ध आउँछ भने सावधानी अत्यावश्यक छ। किनकि, त्यो स्वास्थ्यका लागि हानीकारक हुन सक्छ।
एसी युनिटबाट निस्किने अनेक प्रकारको गन्धले तपाईंको श्वासप्रश्वास प्रणालीमा पनि हानी पुर्याउँछ।
एसीबाट निस्किने गन्ध अलग-अलग प्रकारका हुन्छन्। र, त्यसको कारण पनि अलग हुन्छ। त्यसैले समय-समयमा आफ्नो एसी युनिटको जाँच गराइरहनुपर्छ।
एसीलाई हाई तापमानमा सेट गरिएको छ भने त्यसमा आर्द्रताको मात्रा पनि बढी हुन्छ। त्यस्तोमा एसीभित्र ब्याक्टेरिया बढ्ने जोखिम हुन्छ। त्यसका कारण पनि अनेक प्रकारका गन्ध आउन सक्छन्। एसीभित्र धुलो र माटो जम्मा भयो भने पनि अनेक प्रकारका गन्ध आउँछन्।
कहिलेकाहीं एसीको हावासँगै मोजाको दुर्गन्धजस्तो गन्ध आउँछ। त्यस्तो एसी तत्काल बन्द गर्नु नै उचित हुन्छ। त्यस्तो दुर्गन्ध कन्डेनसेट ट्रे, ड्रेन नोजल, वाटर ट्रे या ड्रेन पेनमा धुलो जम्मा हुँदा आउँछ। त्यसैले एसीलाई तत्काल सफा गर्नु आवश्यक हुन्छ। ड्रेन पेन र इभेपोरेटर क्वाइल सफा गरेपछि त्यस्तो गन्ध हराउँछ।
त्यसका लागि एयर कन्डिसनर प्राविधिकको मद्दत लिनुपर्छ। यदि तपाईंको घरमा दम या एलर्जीका बिरामी छन् भने तत्काल एसी सफा गर्न ढिलाइ नगर्नुहोस्। त्यसबाट निस्किने स-साना कणले उनीहरूको स्वास्थ्य झनै बिगार्छन्।
सडेको अण्डा या सल्फरजस्तो गन्ध आउनुको कारण हो, एयर कन्डिसनरमा ग्यास लिक हुनु। त्यो झनै खतरनाक सावित हुन सक्छ। त्यसले घर या अफिसमा आगलागी पनि गराउन सक्छ।
त्यस्तो गन्ध आएमा तत्काल एसी बन्द गर्नूस् र प्राविधिकको सहायतामा समस्या समाधान नहुन्जेल नखोल्नूस्। एसीभित्र कुनै किरा, फट्यांग्रा मरे भने पनि यस्तो गन्ध आउँछ।
एसीबाट केही जलेको जस्तो गन्ध आयो भने सर्ट सर्किट या मोटर अधिक तातेको लक्षण हो। तत्काल एसी बन्द गरिएन भने घर या अफिसमा आगो लाग्न सक्छ।
कहिलेकाहीं लामो समयपछि एसी खोल्दा पनि यस्तो गन्ध आउँछ। तर, त्यस्तोमा अस्थायी रूपमा मात्र गन्ध आउँछ। तर, निरन्तर गन्ध आइरह्यो भने तत्काल प्राविधिकलाई बोलाइहाल्नूस्। आफैं जान्ने भएर एसी खोल्नतिर नलाग्नूस्।
एसीभित्र ग्यासोलाइनजस्ता इन्धन जल्दा पनि गन्ध आउँछ। त्यस्तो अवस्थामा पनि एसी तत्काल बन्द गरेर प्राविधिकलाई बोलाइहाल्नुपर्छ।