कैलाली । सुदूरपश्चिम प्रदेशका मुख्यमन्त्री दीर्घ बहादुर सोडारीले भोलि विश्वासको मत लिने भएका छन् । यस अघि सम्म एमाले विश्वासको मत दिन तयार नभएपछि दुई पटक सम्म विश्वासको मत लिने समयमा प्रदेश सभा बैठक स्थगित गरिएको थियो ।
बैशाख २१ गते र २२ गते प्रदेश सभा बैठक आह्वान गरिए पनि एमाले तयार नभएपछि तेस्रो पटक जेठ ३ गते विश्वासको मत लिन बैठक आह्वान गरिएको छ । उक्त दिन विश्वासको मत दिने एमालेका समानुपातिक प्रदेश सभासद धर्मराज पाठकले बताए ।
पाठकले अहिलेलाई बिश्वासको मत दिने तर सरकारमा सहभागी नहुने बताउदै बाहिरबाटै समर्थन गर्ने र सरकारको न्युनतम सझा कार्यक्रमका लागि साझेदार दल सङ छल्फल गर्ने निर्णय भएको बताए ।
वैशाख ६ गते एमाले, माओवादी, नेकपा एकीकृत समाजवादी, नागरिक उन्मुक्ति पार्टी (रञ्जिता पक्ष) र स्वतन्त्र एक सांसदको समर्थनमा नेकपा एकीकृत समाजवादी संसदीय दलका नेता सोडारी मुख्यमन्त्रीमा नियुक्त भएका थिए ।
जेठ ४ गतेसम्म उनले विश्वासको मत लिनुपर्ने संवैधानिक व्यवस्था रहेको छ । सोडारीले एक दिन अघि नै विश्वासको मत पाउने करिब पक्का जस्तै भएको छ ।
सोडारीले विश्वासको मत पाए लगत्तै सरकार विस्तार हुनेछ । अहिलेसम्म सोडारी सहित नागरिक उन्मुक्तिका कैलाश चौधरी भौतिक पूर्वाधार विकास मन्त्री र नाउपाकै टिका थापा भूमि व्यवस्था कृषि तथा सहकारी मन्त्री नियुक्त भएका छन् ।
सुदूरपश्चिममा ५३ सांसद छन् । सोडारीले बहुमतको लागि २७ मत पाउनु पर्छ । यहाँ एमालेका ११, माओवादीका सभामुख बाहेक १०, नेकपा एकीकृत समाजवादीका ४, नागरिक उन्मुक्ति पार्टीका ७ र स्वतन्त्र एक सांसद छन् । नाउपामा आन्तरिक विवाद छ । रेशम पक्षमा सांसदहरू यो सरकारको विपक्षमा छन् भने रन्जिता पक्षमा २ सांसद सरकारमै सहभागी छन् ।