काठमाडाैँ । नेकपा माओवादी केन्द्रका अध्यक्ष पुष्पकमल दाहालले कार्यकर्तालाई चुनावका लागि गठबन्धनको भर नपर्न निर्देशन दिएका छन्।
दाहालले काठमाडौं उपत्यका विशेष समन्वय समिति, सम्पर्क समन्वय समिति र प्रवास समन्वय समितिका नेता–कार्यकर्तालाई बुधबार प्रशिक्षण दिने क्रममा यस्तो भनेका हुन्। ‘अब हामी आफैंरएक्लै चुनाव लड्ने हो। गठबन्धनको भर नपरौं..’अध्यक्ष दाहालले समानुपातिक निर्वाचनतर्फ आफूहरूले राम्रै मत पाउने दाबी गर्दै प्रत्यक्षतर्फ जति जिते पनि त्यसलाई स्वीकारेर अघि बढ्नुपर्ने बताएका थिए । दाहालले पहिले केपी ओलीले हेपे जस्तै गरी अहिले कांग्रेसका नेताहरूले पनि माओवादीलाई हेपिरहेको भन्दै त्यस किसिमको हेपाह प्रवृत्ति सहन नहुने बताएका थिए।‘कांग्रेसहरूले पनि ओलीले जस्तै हेपिरहे भने उनीहरूलाई पनि सिध्याउनुपर्छ,’ प्रशिक्षणमा दाहालले भनेका थिए।निर्वाचनका बेला धाँधली भए प्रतिकारमा उत्रिनसमेत दाहालले निर्देशन थियाे ।
अध्यक्ष दाहालले प्रशिक्षणका क्रममा राजतन्त्र र ओली दुवैलाई माओवादीकै बलमा पाखा लगाइएको बताएका थिए। उनले रुक्मागत कटवाललाई सेना प्रमुखबाट हटाउन खोज्नु र गिरिजाप्रसाद कोइरालालाई राष्ट्रपति नबनाउनु माओवादीको गल्ती भएको स्वीकारेका थिए।
उनले व्याख्यात्मक टिप्पणीसहित संसद्ले पारित गरेको एमसिसी सम्झौतालाई अमेरिकाले स्वीकार नगरे त्यो स्वतः खारेज हुने पनि बताए। आन्दोलनमा जाँदा विगतमा पनि जनताले साथ नदिएको र अहिले पनि त्यस्तै अवस्था रहेकाले माओवादी आन्दोलनमा नगएर सत्तामै बस्नुपरेको दाहालले बताएका थिए। उनले सत्तामै बसेर जनताका पक्षमा काम गर्न सकिने स्पष्ट पारेका थिए।
चुनावको मिति नजिकिँदै गर्दा दाहाल प्रदेश तहमा चुनावी प्रशिक्षण गर्दै हिँडिरहेका छन्।
यसअघि उनले विराटनगरमा पनि एक नम्बर प्रदेशस्तरीय भेलालाई सम्बोधन गर्दै गठबन्धनका लागि पहल भइरहेको तर नभए पनि आफ्नै ढंगले चुनाव लड्नुपर्ने बताएका थिए। माओवादीले चुनावलाई लक्षित गर्दै विभिन्न प्रदेशमा प्रशिक्षण कार्यक्रम सञ्चालन गर्ने जनाएको छ।