अमेरिकी संसदको माथिल्लो सदन सिनेटले रुसी राष्ट्रपति भ्लादिमिर पुटिनलाई युद्ध अपराधी घोषणा गरेको छ।
सिनेटको एकमतबाट पुटिनलाई युद्ध अपराधी घोषणा गरिएको हो। अमेरिकी संसदमा यो एक दुर्लभ घटना हो। त्यससम्बन्धी प्रस्तावमा हेगस्थित अन्तर्राष्ट्रिय अपराध न्यायालयलाई युक्रेनमाथि आक्रमणका लागि पुटिनमाथि अनुसन्धान शुरु गर्न आग्रह पनि गरिएको छ। र, उक्त प्रस्ताव पनि सिनेटले एकमतले पारित गरेको छ।
डेमोक्रेटिक सिनेटर चक सुमारले मंगलबार यससम्बन्धी प्रस्तावमा मतदानअघि आफ्नो विचार राख्दै भनेका थिए, ‘युक्रेनमाथि अत्याचारका लागि पुटिनलाई जिम्मेवार ठहर गर्नुपर्छ।’
उक्त प्रस्ताव सिनेटमा प्रस्तुत गर्ने रिपब्लिकन सिनेटर लिन्ड्से ग्राहमले भनेका छन्, ‘हाम्रो आगामी कदम बेलायती र अन्य सहयोगीहरूका साथ काम गर्ने हुनेछ। त्यसमार्फत एक सेल निर्माण गर्नुपर्छ, जसले युद्ध अपराधमा लिप्त रुसी सैन्य एकाइ र तिनका कमान्डरहरूबारे यथेष्ट सूचना प्राप्त गर्न सकियोस्। र, त्यो सूचना सार्वजनिक जानकारीमा हुनुपर्छ। पुटिनलाई लज्जित बनाउने गरी अभियान अगाडि बढाउनुपर्छ।’
