चीनले कोरोना संक्रमण बढेपछि एक मुख्य शहर सेन्जेनमा लकडाउन गरेको छ। आइतबारदेखि लागू हुने गरी सेन्जेनमा लकडाउन गरिएको हो।

समाचार एजेन्सी एएफपीका अनुसार शहरको पूरै जनसंख्यालाई लागू हुनेगरी लकडाउन गरिएको हो। दक्षिण–पूर्वी शहर सेन्जनले हङकङलाई चीनको ‘मेनल्यान्ड’सँग जोड्छ। यो चीनको अत्यधिक आवादी भएको शहर पनि हो, जहाँ करिब एक करोड ७० लाख जनसंख्या बसोबास गर्छ।

चीनमा दैनिक संक्रमण दोब्बर बढेर तीन हजार ४०० पुग्न थालेको छ। चीनले ‘जिरो कोभिड’ नीति लिँदै कडा रवैया अपनाउँदै आएको छ। पछिल्ला दिनमा संक्रमण दर उकालो लागेपछि चीनमा तनावको माहोल छ।

सेन्जेनका सबै नागरिकलाई सरकारले घरभित्रै बस्न निर्देशन दिउको छ। किनकि, छिमेकी शहर हङकङ कोरोनाको ओमिक्रोन भेरियन्टबाट अत्यधिक प्रभावित छ। र, ओमिक्रोन संक्रमित अत्यधिक बढेका छन्।

सेन्जेन प्रशासनले जारी गरेको सूचनामा २० मार्चसम्म लकडाउन कायम रहने र सार्वजनिक यातायात पूर्ण रूपमा बन्द रहने उल्लेख छ। तीन चरणमा शहरवासीको स्वास्थ्य जाँच हुने प्रशासनले बताएको छ। ‘तत्काल रोकथाम र नियन्त्रणको उपाय नअपनाउँदा संक्रमण अझ धेरै प्रसार हुन सक्छ, त्यसैले लकडाउन गरिएको हो,’ सेन्जेनका स्वास्थ्य अधिकारी लिन हङचेङले भने।

चीनका अन्य शहरमा पनि कोरोना संक्रमण बढेको छ। बढ्दो संक्रमणलाई मध्यनजर गर्दै सांघाईका अधिकारीहरूले सबै विद्यालय बन्द गराएका छन्। पूर्वोत्तरका अन्य शहरमा पनि संक्रमण उकालो लागेको छ।

चीनका १८ वटा प्रान्त ओमिक्रोन र डेल्टा भेरियन्टका क्लस्टरबाट प्रभावित छन्। सन् २०१९ मा चीनकै वुहान शहरबाट कोरोना भाइरस विश्वव्यापी फैलिएको हो। त्यतिबेलादेखि नै चीनले ‘जिरो कोभिड’ नीति लिँदै कडाइ गर्दै आएको छ।