इराकको इरबिलस्थित अमेरिकी वाणिज्य दूतावासमाथि १२ भन्दा बढी क्षेप्यास्त्र प्रहार भएको छ। उत्तरी इराकको कुर्द इलाकामा अमेरिकी वाणिज्य दूतावासलाई विद्रोही समूहले निशाना बनाएको इराकी अधिकारीहरूले जनाएका छन्।

प्रहार भएका क्षेप्यास्त्रमध्ये अधिकांश वाणिज्य दूतावास भवनमा गिराइएको छ। ती क्षेप्यास्त्र कुन विद्रोही समूहले प्रहार गरेको हो भन्ने यकिन भएको छैन। समाचार एजेन्सी एएफपीका अनुसार भवनको पूर्वतर्फबाट क्षेप्यास्त्र प्रहार भएको हो। क्षेप्यास्त्र प्रहारबाट दूतावास कर्मचारी सकुशल रहेको अधिकारीहरूले बताएका छन्।

अमेरिकी विदेश मन्त्रालयका प्रवक्ताले उक्त घटनालाई क्रुर आक्रमण संज्ञा दिएका छन्। एएफपीका अनुसार यसअघि पनि अमेरिकाको नेतृत्वमा त्यस क्षेत्रमा रहेको सैन्य गठबन्धनका टुकडीहरू माथि रकेट र ड्रोन आक्रमण हुँदै आएको छ।

त्यहाँबाट पूर्वतर्फ इरानी भूमिबाट दूतावासमा आक्रमण भएको आरोप अमेरिकी अधिकारीहरूको छ। यसअघि सिरियाको राजधानी दमास्कसमा इजरायलको आक्रमणमा इरानका रिभोल्युसनरी गार्डसका दुई सदस्यको मृत्यु भएको थियो। त्यतिबेला इरानले उक्त आक्रमण बदला लिने बताएको थियो।

इराकमा जनवरी २०२० यता पहिलोपटक अमेरिकी नियोगलाई निशाना बनाइएको हो। त्यतिबेला इरानका सैन्य कमान्डर कासिम सुलेमानीको अमेरिकी फौजले गरेको हत्याको जवाफमा अमेरिकी सेनालाई निशाना बनाइएको थियो।