अमेरिकी राष्ट्रपति जो बाइडेनले युक्रेन युद्धमा हस्तक्षेप गर्दा तेस्रो विश्वयुद्धको जोखिम रहेको बताएका छन्।
‘त्यसैले अमेरिकाले रुसबाट युक्रेनको सुरक्षाका लागि सेना पठाउन नसकेको हो,’ बाइडेनले शुक्रबार ट्विट गर्दै भनेका छन्, ‘हामी एक मजबुत नेटोको पूर्ण क्षमताका साथ नेटो क्षेत्रको हर इन्चको सुरक्षामा जुटेका छौँ। हामी युक्रेनमा रुसविरुद्ध लडाईंमा होमिँदैनौं। किनकि, नेटो र रुसबीचको सीधा लडाईं तेस्रो विश्वयुद्धजस्तो हुनेछ।’
रुससँग लड्न युक्रेनमा नेटो सदस्य मुलुकका सेना नपठाइने बाइडेनले दोहोर्याउँदै आएका छन्। जब कि, युक्रेनका राष्ट्रपति भोलोदिमिर जेलेन्स्कीले बारम्बार नेटो सैन्य मद्दत माग्दै आएका छन्।
जेलेन्स्कीले युक्रेनमा ‘नो फ्लाइ जोन’ घोषणा गर्न नेटो मुलुकहरूसँग आग्रह गर्दै आएका छन्। तर, पश्चिमा मुलुकले युक्रेनमा हस्तक्षेप गर्न अस्वीकार गर्दै आएका छन्।
त्यसको साटो अमेरिका र पश्चिमा मुलुकहरूले रुसमाथि आर्थिक प्रतिबन्धलाई थप कडा बनाइरहेका छन्। युक्रेनमाथि आक्रमण शुरु गरेयता पश्चिमा मुलुकले रुसमाथि धमाधम कडा आर्थिक प्रतिबन्ध लगाइरहेका छन्। अमेरिकाले रुसबाट पेट्रोलियम पदार्थको आयातमा प्रतिबन्ध लगाएको छ।
पश्चिमा मुलुकको कडा आर्थिक प्रतिबन्धका कारण रुसको अर्थतन्त्र धरासायी बन्दै गएको छ। शुक्रबार पनि अमेरिकी राष्ट्रपति बाइडेनले रुसबाट मदिरा, सी फुड र हिराको आयातमा प्रतिबन्ध घोषणा गरेका छन्। रुसका ठूला उद्योगी, व्यापारीविरुद्ध पनि अमेरिकाले प्रतिबन्ध लगाएको छ।
बीबीसीबाट