काठमाडौं– मध्यपूर्वमा बढ्दो तनावका बीच इरान र इजरायल युद्ध उन्मुख भएका छन्। दुई इरानी जनरलको मृत्यु हुने गरी यसै महिनाको सुरुमा भएको हमलालाई लिएर तेहरानले इजराइलविरुद्ध नयाँ धम्की जारी गरेको छ।
त्यसपछि अमेरिकी राष्ट्रपति जो बाइडेनले बुधबार इजराइलका लागि ‘कडा’ समर्थनको प्रतिज्ञा गरेका छन्। बाइडेनले इजरायलले इरानमा आक्रमण गरे अमेरिकाले सहयोग गर्ने बताएका छन्।
यता मस्कोले भने बिहीबार इरान र इजराइलसँग संयमता अपनाउन आग्रह गरेको छ। क्रेमलिनका प्रवक्ता दिमित्री पेसकोभले पत्रकारहरूसँग भने, “यस क्षेत्रलाई अस्थिर हुन नदिन सबैले संयमता अपनाउन अत्यन्तै महत्त्वपूर्ण छ।” रुसले पहिला गाजामा छ महिनाको युद्धमा इजराइलको कडा निन्दा गरेको थियो।
मस्कोले परम्परागतरूपमा मध्यपूर्वका सबै प्रमुख शक्तिसँग सम्बन्ध कायम राख्ने प्रयास गरेको थियो। यद्यपि गाजा युद्धले इजराइलसँग उसको सम्बन्धलाई बिग्रिएको छ र उसले पहिलादेखि नै इरानसँग सैन्य र राजनीतिक सम्बन्धलाई सुदृढ बनाइरहेको छ।
दुवै कट्टर प्रतिद्वन्द्वीबीच सम्भावित मध्यस्थताका रूपमा रुससँग सम्पर्क नगरिएको पेसकोभले बताए।
