पाकिस्तानको प्रमुख विपक्षी दलले प्रधानमन्त्री इमरान खानको सरकारविरुद्ध अविश्वास प्रस्ताव दर्ता गरेको छ। त्यसका लागि विपक्षी दलहरूको गठबन्धन पाकिस्तान डेमोक्रेटिक मुभमेन्ट (पीडीएम)को मुख्य भूमिका छ।

पाकिस्तानको संविधानअनुसार अविश्वास प्रस्ताव पारित हुन सामान्य बहुमत भए पुग्छ। पाकिस्तानको नेसनल एसेम्ब्लीमा ३४२ सदस्य छन्। अविश्वास प्रस्ताव पारित हुन १७२ सदस्य भए पुग्छ।

प्रधानमन्त्री खानको पार्टी पीटीआईसँग नेसनल एसेम्ब्लीमा १५५ सिट छन्। उनको सरकार गठबन्धनका सहयोगी दलहरूको मद्दतबाट चलेको छ। तीमध्ये अधिकांश पार्टी सेनासँग निकटस्थ छन्।

सत्ता साझेदार मुस्लिम लिग कायद–ए–आजम, मुत्ताहिदा क्वामी मुभमेन्टले आफूहरूलाई सरकारमा उपयुक्त सहभागिता नदिइएको बताउँदै असन्तुष्ट छन्। विपक्षी गठबन्धनले ती दललाई आफूतिर तान्न सक्यो भने इमरानको सरकार संकटमा पर्नेछ। तर, ती दलले विपक्षलाई साथ दिने–नदिने यकिन छैन।

विपक्षी गठबन्धनले बढ्दो महँगी नियन्त्रण गर्न नसकेको तथा कुशासन चलाएको आरोप लगाउँदै आएको छ।