बराहक्षेत्र– सुनसरीको बराहक्षेत्र नगरपालिका-१ चावचाबाट प्रहरीले २७ किलो बेवारिसे अवस्थामा लुकाइएको गाजा बरामद गरेको छ। बुधबार स्थानीयवासीले लागुपदार्थ गाँजा बेवारिसे अबस्थामा खोलामा लुकाइ छिपाई राखेको देखेपछि इलाका प्रहरी कार्यालय चतरामा जानकारी गराएका थिए। त्यसलगत्तै उक्त गाँजा वडासदस्य कुमार भट्टराईको रोहबरमा प्रहरीलाई जिम्मा लगाइएको स्थानीय लोकबहादुर दाहालले बताए।
वडासदस्य भट्टराईले स्थानीय बासिन्दा र प्रहरीले उक्त बेवारिसे गाँजा नापतौल गर्दा २७ किलो २४० ग्राम रहेको जानकारी बताए। बरामद गरिएको गाँजा इलाका प्रहरी कार्यालय चतराको नियन्त्रण राखि कानुनी प्रक्रियाको लागि बिहिबार इलाका प्रहरी कार्यालय महेन्द्रनगर चक्रधटीमा बुझाउने प्रहरीले जानकारी दिएको छ।
बराहक्षेत्र नगरपालिका-१ रुट हुँदै र सप्तकोशी नदीबाट लागुपदार्थ तथा दुई नम्बरी धन्दा(तस्करी) गर्नेहरूको लागि ट्रान्जिट पोइन्ट भईरहेको र लागुपदार्थ प्रहरी प्रशासनले पटकपटक एम्बुलेन्स लगायत अन्य सवारीसाधनमा समेत मान्छेसहित पक्राऊ गरिरहेको धटनाले पुष्टि गरिरहेको वडा नं १ का अध्यक्ष किसन थापामगर बताउँछन।
गाँजा भित्रिदै छ भन्ने सुचना प्राप्त भएपछि इलाका प्रहरी कार्यालय चतराको टोलीले दिनभर निगरानी गर्दै चेकजाँच र खोजतलास गर्दा पनि गाँजा ओसारपसार गर्ने व्यक्तिहरूलाई पक्रिन नसकेको प्रहरीले बताएको छ।