सुनसरी-  बराहक्षेत्र नगरपालिका-१ भएर बहने सप्तकोशी नदीको पानी धरान लैजाने विषयमा सार्वजनिक सुनुवाइ गरिएको छ।

स्थानीय बासिन्दा र सरोकारवाला निकायबीच बुधबार सार्वजनिक सुनुवाइ सम्पन्न भएको हो।

धरानमा खानेपानी समस्याको दीर्घकालीन समाधानका लागि चतराबाट सप्तकोशीको पानी लाने विषयमा धरान खानेपानी परियोजनाको प्रारम्भिक वातावरणीय परीक्षण अध्ययन प्रतिवेदन तयारीको विषयमा स्थानीय बासिन्दा र सरोकारवाला निकायबीच वडा १ को कार्यालयमा ‘सार्वजनिक सुनुवाइ गरिएको हो।

उक्त आयोजनाको प्रारम्भिक वातावरणीय प्रभावसम्बन्धी कार्यक्रममा स्थानीय पुष्पराज ढुंगानाले स्थानीय बासिन्दालाई रोजगारी दिनुपर्ने बताए। आयोजनाको कारण वातावरणमा पुग्ने असर न्यूनीकरण गर्नुपर्ने, पाइपलाइन विस्तार क्रममा कुनै क्षति भएमा जिम्मेवारी लिनुपर्ने, बराहक्षेत्रको खानेपानीको समस्यासमेतलाई प्याकेजको रूपमा हल गर्नुपर्ने सुझाव उनले दिए। स्थानीय सरोकारवालाको जायज माग आयोजनाले सुनवाइ गर्नुपर्ने धारणा उनको थियो।

धरान उपमहानगरपालिकाका मेयर हर्क साम्पाङले लिफ्टिङ प्रणालीद्वारा चतराबाट धरान पानी लैजाँदा स्थानीय स्तरमा इन्टेक निर्माण गरी पाइपलाइन विस्तार गरिने बताए। सप्तकोशीको पानी प्रयोगवापत स्थानीय बासिन्दाहरूले राखेका जायज माग सम्बोधन गर्न आफूहरू तयार रहेको उनले बताए।

पानी प्रशोधन केन्द २५ सय घन मिटर, सुम्निमा ट्यांकी ६ हजार घन मिटर, फुस्रे, विजयपुर, पिण्डेश्वर ट्यांकी ५०० घन मिटरको रहने एकीकृत खानेपानी तथा ढल व्यवस्थापन आयोजना प्रमुख महेश न्यौपानेले जानकारी दिए। उनका अनुसार आयोजना सम्पन्न गर्न करिब ५ अर्ब बजेट लाग्ने अनुमान छ।

उक्त कार्यक्रममा स्थानीय बासिन्दाले राखेका १० वटा राय सुझाव लिखित रूपमा टिपोट पनि गरिएको थियो।

बराहक्षेत्र–१ का वडाध्यक्ष किसन थापा मगर, धरानका मेयर साम्पाङ, आयोजना प्रमुख न्यौपाने, धरान–१८ का वडाध्यक्ष नरेन्द्र (प्रवीण) राई, ४ का वडाध्यक्ष धनबहादुर राई, ११ का वडाध्यक्ष लोकेन्द्र फागो, १३ का वडाध्यक्ष नेत्रप्रसाद काफ्लेलगायत स्थानीय राजनीतिक दलका प्रतिनिधिहरू कार्यक्रममा उपस्थित थिए।

कार्यक्रममा बराहक्षेत्र–१ का वडाध्यक्ष मगरले वडाको तर्फबाट साविक बराहक्षेत्र गाविस ७, ८ र ९ का सूर्यकुण्ड, चियाबारी, अर्चले, चावचा, बागदवारी, सिधुरे पुच्छरलगायत बासिन्दाका लागि पर्याप्त मात्रामा खानेपानी आयोजनाले उपलब्ध गर्नुपर्ने सुझाव दिए।

उक्त कार्यक्रम एकीकृत खानेपानी तथा ढल व्यवस्थापन आयोजना, पानीपोखरी, काठमाडौं र धरान खानेपानी व्यवस्थापन बोर्डको आयोजनामा सम्पन्न भएको हो।