सुनसरी- बराहक्षेत्र नगरपालिकामा मेयर रमेश कार्कीले मनोमानी तरिकाले सडक विस्तार गरेको भन्दै स्थानीय बासिन्दा आमरण अनसनमा उत्रिएका छन्।
मेयर कार्कीको गतिविधिको विरोधको शुरुवात मुनाल चोकबाट भएको छ। महेन्द्र गेटबाट बस स्टेन्डसम्म जाने बाटो विस्तार गर्ने क्रममा कहीं ६५, ७० र ८५ फिट मेयरले आफूखुशी मनोमानी तरिकाले बाटोको मापदण्ड कायम गरेकाले पीडित पक्षले आमरण अनसन थालेका छन्।
विगत १ महिनादेखि नगरले सडक विस्तार गर्ने नाममा स्थानीयवासीलाई थाहै नदिई सुनियोजित तरिकाले उनीहरूलाई उठिवास लगाउन मेयर कार्की उद्यत रहेको हुँदा उक्त मनपरीतन्त्रविरुद्ध आन्दोलन गर्नुको विकल्प आफूहरूसँग नरहेको अनसनमा बसेका पीडित नवीन गौतमले बताए।
‘आफू र आफ्ना मान्छेलाई जोगाएर अरूलाई थिचोमिचो गर्न पाइँदैन’, ‘सडक विस्तार समान रूपले होस्’, ‘आफ्नो ६५ मा जोगाएर अरूको ८० मा भत्काउन पाइँदैन’जस्ता नाराहरू लेखिएका प्लेकार्डसहित अनशन शुरु गरेका छ्न। गौतमले भने, ‘नगरले हाम्रो पीडित पक्षको कुरा नै सुन्न मानेन, एक महिनादेखि मेयरलाई भेट्न खोज्दासमेत भेट दिएनन्। सडक विस्तार पनि मनपरी ढंगले गर्ने भएपछि बाध्य भएर हामीले आमरण अनसन शुरु गरेका छौं।’
अनसनमा बसेकी रिना खड्काले भनिन्, ‘हामीले कुनै नहुने माग राखेका छैनौं। मात्र बाटो विस्तार गर्दा समान रूपले होस्, कसैलाई काखा, कसैलाई पाखा गरी आग्रह–पूर्वाग्रह तरिकाले नाला निर्माण र बाटो विस्तार नगरियोस।’
अनसनमा रिना खड्का, तीर्थ लुइँटेल र नवीन गौतम बसेका छन्। उक्त बाटोमा पर्ने १ सयभन्दा धेरै घरपरिवार र स्थानीय बासिन्दाहरूको साथ समर्थन रहेको कुरा खड्काले बताइन्।