अमेरिकाका पूर्वराष्ट्रपति डोनाल्ड ट्रम्पले युक्रेनका दुई इलाकालाई स्वतन्त्र राष्ट्रको मान्यता दिने रुसी राष्ट्रपति भ्लादिमिर पुटिनको निर्णयप्रति समर्थन जनाएका छन्।
छिमेकी मुलुक युक्रेनलाई विभाजित गराउने पुटिनलाई ट्रम्पले ‘जिनियस’ संज्ञा दिएका छन्। रुसी राष्ट्रपति पुटिनले युक्रेनका पूर्वी क्षेत्रस्थित दोनेत्स्क र लुहान्स्कलाई अलग राष्ट्रको मान्यता दिएको र त्यहाँ शान्ति स्थापनार्थ सेना पठाउने घोषणा पुटिनले गरेका थिए।
उक्त घोषणाप्रति ट्रम्पले समर्थन जनाएका हुन्। एक दक्षिणपन्थी रेडियो कार्यक्रममा ट्रम्पलाई युक्रेनमा विकसित घटनाक्रमका बारेमा प्रतिक्रिया दिन भनिएको थियो। ‘टेलिभिजनमा हेरेँ, मलाई त जिनियस निर्णय लाग्यो,’ उनले जवाफ दिए, ‘पुटिनले युक्रेनको एक ठूलो हिस्सालाई अलग गरिदिएका छन्। त्यसलाई स्वतन्त्र घोषणा गरिदिएका छन्। ओहो, यो अदभूत कुरा हो। पुटिन भन्दै छन्– युक्रेनको एक ठूलो हिस्सा स्वतन्त्र भएको छ।’
ट्रम्पले पुटिनलाई एक धेरै चतुर राजनीतिज्ञ पनि बताएका छन्। ‘अब उनी युक्रेनभित्र जाने छन् र शान्ति कायम गर्नेछन्। त्यो सबैभन्दा बलियो शान्ति सेना हुनेछ। र, अमेरिकाले पनि देशको दक्षिणी सीमामा त्यसको प्रयोग गर्न सक्छ,’ ट्रम्पले भने।
पूर्वराष्ट्रपति ट्रम्पले निरन्तर पुटिनको प्रशंसा गर्दै आएका छन्। र, त्यसलाई अमेरिकाका राष्ट्रपति जो बाइडेनको आलोचना गर्दै आएका छन्। ‘तपाईंले मान्नुपर्छ, पुटिन धेरै समझदार नेता हुन्। र, तपाईंलाई थाहा छ, बाइडेनले यसमा के प्रतिक्रिया दिए ? उनको केही पनि प्रतिक्रिया थिएन,’ ट्रम्पले भने।