बराहक्षेत्र– प्रत्येक वर्ष कार्तिक शुक्ल त्रयोदशीका दिन चतरा गद्दीबाट बराहक्षेत्रका लागि निस्कने साधु-सन्यासीको निशान यात्रा बराहक्षेत्र प्रस्थान गरेको छ।
निशान झण्डा सहितको पदयात्रा पूर्णिमाका दिनसम्म बराहक्षेत्रमा राखेर सोही विधिअनुसार पुनः चतरा मठ ल्याउने गरिएको छ।
२६० वर्षअघि स्थापना भएको चतरा गद्दीबाट आधिकारिक रुपमा निशान यात्रा वराहक्षेत्र पुग्ने गरेको बराहक्षेत्र मन्दिरका पुजारी योगेश भण्डारी ‘वराहक्षेत्र’ ले जानकारी दिए। औलिया महामुनी पिठ चतरा गद्दीबाट निशान यात्रा वराहक्षेत्र पुगेपछि औपचारिक रुपमा बराहक्षेत्रमा एकादशी मेला सुरु हुन्छ।
वि. सं. १८२१ मा चतरा गद्दीको स्थापना भएपछि बर्सेनि निशान यात्रा चतरा गद्दीबाट बराहक्षेत्र लाने गरिएको छ। औलिया बाबा वराह भगवानका पहिलो मानव पुजारी रहेकाले औलिया बाबाको प्रतीक स्वरुप निशान झण्डा लाने गरिएको पुजारी भण्डारी बताए।
शनिबार सप्तकन्या र पन्चे बाजा सहितको निशान यात्रालाई स्थानीय सुरक्षा ससस्त्र प्रहरी नेपाल प्रहरी र नगर प्रहरीहरुले सलामी दिएपछि चतरा गद्दी, चतरा बजार परिक्रमा गर्दै बराहक्षेत्र प्रस्थान गरेको हो।
निशान झण्डा सहितको पदयात्रामा जुना अखाडाका जोगी-सन्यासी, चतरा गद्दीका साधु-सन्त, वराहक्षेत्रका जनप्रतिनिधि स्थानीयवासी सहितको पदयात्रा वराहक्षेत्र प्रस्थान गरेको छ।
गत बिहीबारदेखि ५ दिने एकादशी कात्तिके मेला बराहक्षेत्रमा लाग्दैछ। बर्सेनि लाग्ने मेलामा नेपालसहित भारत,सिकिम, दार्जिलिङ भुटान लगायत विभिन्न स्थानबाट हिन्दू धर्मावलम्बीहरु आउने गरेका छन्। 
