जाजरकाेट– जाजरकाेट भुकम्पका कारण पश्चिम नेपालमा ठूलाे धनजनकाे क्षति भएको छ। क्षतिकाे संकलन अझै जारी रहेकाेले क्षतिकाे विवरण बढिरहेको छ।

पीडितहरू राहतकाे आशमा खुला आकाशमुनि रात विताइरहेका छन्। उद्दारमा प्रभावकारी काम गरेकाे सरकारले राहतमा भने एकद्वार प्रणाली भन्दै समयमै राहत उपलब्ध गराउन नसकेकाे गुनासाे पीडितले गरेका छन्।

भूकम्पका कारण भेरी नगरपालिकामा तीन सय ४४ घर पूर्णरुपमा भत्किएका छन् भने आंशिक सात सय १२, दुईवटा विद्यालय पूर्ण रुपमा भत्किएको र १७ वटा आंशिक रुपमा क्षति भएको छ। नगरपालिकामा पाँचवटा सरकारी कार्यालयमा क्षति पुगेको छ। मृत्युको सङ्ख्या ३६ छ भने घाइते ६५ रहेको छ।

नलगाड नगरपालिकामा दुई सय घर पूर्णरुपमा क्षति भएको र ६ सय घर आंशिक भत्किएका छन्। विद्यालय १२ पूर्ण रुपमा भत्किएका छन्भने आंशिक रुपमा २१ वटामा क्षति पुगेको छ। ६ वटा सरकारी कार्यालयमा क्षति भएको छ। मृत्यु हुनेको सङ्ख्या ५२ छ। ७३ जना घाइते भएका छन्।

छेडागाडमा एक सय घरमा पूर्ण क्षति भएको र आंशिक रुपमा पाँच सयमा क्षति भएको छ। तीन विद्यालयमा आंशिक क्षति भएको पाइएको छ। मृत्यु दुईजनाको भएको छ भने घाइते एकजना भएको बताएको छ।

कुशे गाउँपालिकामा ९५  घर पूर्णरुपमा क्षति भएको छभने तीन सय एकवटा आंशिक रुपमा क्षति पुगेको छ। चारवटा विद्यालय पूर्णरुपमा भत्किएका छन् भने १७ वटा आंशिक रुपमा क्षति भएको पाइएको छ। कुशेमा सरकारी कार्यालय एकवटा पूर्णरुपमा भत्किएको छभने १७ आंशिक रुपमा क्षति पुगेको छ। दुईजनाको मृत्यु र एकजना घाइते भएको पाइएको छ।

प्रहरीका अनुसार बारेकोटमा १६० घरहरु पूर्ण रुपमा भत्किएका छन् भने  पाँच सय ६० घर आंशिकरुपमा क्षति पुगेको छ। पाँचवटा विद्यालय पूर्णरुपमा भत्किएका छन् भने दुईवटा आंशिकरुपमा भत्किएको पाइएको छ। एक सरकारी कार्यालय पूर्ण रुपमा भत्किएको र दुई कार्यालय आंशिक क्षति पुगेको जानकारी प्राप्त भएको छ। चारजनाको मृत्यु तथा चारजना घाइते भएका छन्।

शिवालय गाउँपालिकामा एक घर पूर्णरुपमा भत्किएको र ३७ वटा घर आंशिक क्षति भएको छ। पाँचवटा विद्यालयमा आंशिक क्षति पुगेको छ । एक सरकारी कार्यालयमा क्षति पुगेको बताएको छ। एकजना घाइते भएका छन्।

जुनिचाँदे गाउँपालिकामा दुई सय ७० घर पूर्ण रुपमा भत्किएको र चार हजार ५६ घरमा आंशिक क्षति भएको छ।

जाजरकोटमा एक हजार एक सय ७०  घर पूर्णरुपमा क्षति भएको पाइएको छ। सात हजार एक सय ६६ वटा घर आंशिक रुपमा क्षति भएको पाइएको छ। २३ विद्यालयको पूर्ण क्षति र ७५  आंशिक क्षति भएको जानकारी आएको छ। एक सय एक जनाको मृत्यु भएको छ। एक सय ५२ घाइते भएको प्रहरीले जनाएको छ।