काठमाडौं -सुनसरी धरान उपमहानगरपालिका-१४ पिण्डेश्वरी चोकबाट सोही ठाउँ बस्ने २१ वर्षीय पारुहाङ राईलाई नियन्त्रित लागूऔषध ५ हजार ८ सय ९० ट्याव्लेट ट्रामाडोल र ५ हजार ५ सय ९० ट्याव्लेट स्पास्मो प्रोक्सीभन सहित शुक्रबार दिउँसो प्रहरीले पक्राउ गरेको छ । ईलाका प्रहरी कार्यालय धरान र अस्थाई प्रहरी पोष्ट विजयपुरबाट खटिएको प्रहरीले जाँच गर्नेक्रममा उनलाई उक्त लागूऔषध सहित फेला पारी पक्राउ गरेको हो ।
कञ्चनपुर भिमदत्त नगरपालिका-१८ कटानबाट बेदकोट नगरपालिका-६ बस्ने १९ वर्षीय दिवश अवस्थीलाई ३ ग्राम २९ मिलीग्राम अवैध लागूऔषध खैरो हेरोइन सहित शुक्रबार दिउँसो प्रहरीले पक्राउ गरेको छ । लागूऔषध नियन्त्रण व्यूरो शाखा कार्यालय र जिल्ला प्रहरी कार्यालय कञ्चनपुरबाट खटिएको प्रहरीले जाँच गर्नेक्रममा उनलाई उक्त लागूऔषधसहित फेला पारी पक्राउ गरेको हो ।
झापा बिर्तामोड नगरपालिका-५ मेघा कम्प्लेक्स अगाडिबाट सोही नगरपालिका-१ बस्ने राजु भन्ने ४५ वर्षीय टेक बहादुर बस्नेतलाई ६ ग्राम अवैध लागूऔषध ब्राउनसुगर जस्तो देखिने पदार्थसहित शुक्रबार दिउँसो प्रहरीले पक्राउ गरेको छ । उक्त स्थानमा पार्किङ गरी राखेको बा.१८ च ४४८७ नम्बरको कारलाई ईलाका प्रहरी कार्यालय अनारमनीबाट खटिएको प्रहरीले जाँच गर्नेक्रममा कारको अगाडिको भागमा लुकाई राखेको अवस्थामा उक्त पदार्थ फेला पारी कार चालक टेक बहादुरलाई पक्राउ गरेको हो ।
मकवानपुर मनहरी गाउँपालिका-६ सुनाचुरीस्थित सडकबाट करिब ६० केजी अवैध लागूऔषध गाँजा गएराति प्रहरीले बरामद गरेको छ । ईलाका प्रहरी कार्यालय मनहरी र प्रहरी चौकी सुनाचुरीबाट खटिएको संयुक्त प्रहरीलाई देख्नासाथ बोरामा ल्याउँदै गरेको उक्त गाँजा छोडेर अपरिचित व्यक्तिहरू फरार भएपछि प्रहरीले बरामद गरेको हो । हाल फरार व्यक्तिहरूको प्रहरीले खोजी गरिरहेको छ ।