काठमाडौं -काठमाडौं महानगरपालिका-६ कपनमा ‘लिभिङ टुगेदर’मा बस्दै आएका खोटाङ शाक्ला गाउँपालिका-५ घर भएकी २२ वर्षीया युशिना राई गएराति मृत अवस्थामा फेला परेकी छन् भने घाइते अवस्थामा फेला परेका उनीसँगै बस्ने संखुवासभा घर भएका २५ वर्षीय अनिष जिमीको उपचारको क्रममा मृत्यु भएको छ । उक्त घटनाको खबर प्राप्त हुनासाथ महानगरीय प्रहरी प्रभाग कपनबाट खटिएको प्रहरीले युनिशाको शव फेला पारेको तथा घाइते अनिषलाई उपचारको लागि हेल्पिङ ह्याण्ड अस्पताल चाबहिल पठाएकोमा उपचारको क्रममा उनको मृत्यु भएको हो । महानगरीय अपराध महाशाखा मिनभवन र महानगरीय प्रहरी वृत्त बौद्धबाट खटिएको प्रहरीले घटना सम्बन्धमा थप अनुसन्धान गरिरहेको छ ।

यसैगरी काठमाडौं चन्द्रागिरी नगरपालिका-१ दहचोक बस्ने मोरङ रंगेली नगरपालिका-९ घर भएका २५ वर्षीय दिपक रिसिदेब सोही नगरपालिका-४ चन्द्रागिरी महिला सामुदायिक वनस्थित थानकोट चितलाङको भीरमा बिहीबार मृत अवस्थामा फेला परेका छन् । मकवानपुर थाहा नगरपालिका-९ चित्लाङबाट पुस १६ गते हराई बेपत्ता भएका उनको महानगरीय प्रहरी वृत्त थानकोटबाट खटिएको प्रहरीले खोजी गर्ने क्रममा उक्त भीरमा उनको शव फेला परेको हो । पर्सा, वीरगंज महानगरपालिका-२३ ईटियाहीस्थित नहरमा हाल नाम, थर, वतन नखुलेका करिब ४५ वर्षीय पुरुष बिहीबार मृत अवस्थामा फेला परेका छन् ।