काठमाडौं -पर्सा जिराभवानी गाउँपालिका-५ स्थित भलुवाही खोलामा ना.६ त ९२५८ नम्बरको ट्याक्टरको ठक्करबाट सोही ठाउँ बस्ने ४० वर्षीय लक्ष्मी भैया थारुको शुक्रबार दिउँसो मृत्यु भएको छ । ठक्करबाट गम्भीर घाइते भएकी उनको उपचारको लागि नारायणी अस्पताल वीरगंजतर्फ लैजाने क्रममा बाटोमै मृत्यु भएको हो । ट्याक्टर चालकलाई प्रहरीले नियन्त्रणमा लिएको छ ।
चितवन ईच्छाकामना गाउँपालिका-३ नारायणगढ मुग्लिङ सडकमा ग.१ ज ७१७० नम्बरको सुमो गाडीले प्रदेश ३-०२-००७ प ६३३० नम्बरको मोटरसाइकललाई शुक्रबार दिउँसो ठक्कर दिँदा मोटरसाइकल चालक काठमाडौं कपन बस्ने २० वर्षीय प्रवेश ढकाल र सोही ठाउँ बस्ने १९ वर्षीय आयुष कुमार खडकाको मृत्यु भएको छ । ठक्करबाट गम्भीर घाइते भएका उनीहरुको उपचारको लागि भरतपुरतर्फ लैजाने क्रममा बाटोमै मृत्यु भएको हो । सुमो चालकलाई प्रहरीले नियन्त्रणमा लिएको छ ।
कास्की पोखरा महानगरपालिका-६ वडा कार्यालयस्थित सडकमा ग.२ च १११८ नम्बरको गाडीको ठक्करबाट पैदलयात्री सोही महानगरपालिका-१७ पाल्पाली बस्ने स्याङजा फेदीखोला-५ मटिखान घर भएका ४० वर्षीय सुनिल गुरुङको गएराति मृत्यु भएको छ । ठक्करबाट गम्भीर घाइते भएका उनको मेट्रोसिटी अस्पतालमा उपचारको क्रममा मृत्यु भएको हो । साथै गाडीको ठक्करबाट घाइते भएका पोखरा महानगरपालिका-१३ काहुँखोला बस्ने २२ वर्षीया सलिना बरालको सोही अस्पतालमा उपचार भइरहेको छ । गाडी चालकलाई प्रहरीले नियन्त्रणमा लिएको छ ।
काभ्रेपलान्चोक बनेपा नगरपालिका-७ पुरानो तरकारी बजार अगाडि हाल नम्बर नखुलेको मोटरसाइकलको ठक्करबाट पैदलयात्री सोही नगरपालिका-८ तिनधार बस्ने ६० वर्षीय नुछेलाल मानन्धरको शनिबार बिहान मृत्यु भएको छ । ठक्करबाट गम्भीर घाइते भएका उनको शिर मेमोरियल अस्पताल बनेपामा उपचारको क्रममा मृत्यु भएको हो । ठक्कर दिने मोटरसाइकलको प्रहरीले खोजी गरिरहेको छ ।