भैरहवा– साउन १५ अर्थात खीर खाने दिन आज देशैभरी खीर खाने प्रचलन छ। यसै अवसरमा रोट्रयाक्ट क्लब अफ लुम्बिनी सिद्धार्थनगर र रोट्रयाक्ट क्लब अफ भैरहवा चौतारीले संयुक्त रुपमा भैरहवाको शिवमन्दिर परिसरमा खीर खुवाउने कार्यक्रम आयाेजना गरेका छन्।
साउन १५ र साउने सोमबार दुवै एकैदिन परेको अवसर पारेर पुजा गर्न आएका भक्तजनलाई प्रसाद स्वरुप खीर र दहि वितरण गरेको रोटर्याक्ट क्लब अफ भैरहवा चौतारीका अध्यक्ष शंकर बस्यालले बताए।
सनातन वैदिक सभ्यता अनुसार पूजाआजा तथा शुभकार्यमा खीरलाई प्रसादका रुपमा लिइन्छ। पारिवारिक भेटघाट तथा चाडपर्व र विशेष दिनमा खीरको पोषिलो परिकार बनाई खाने चलन छ। उक्त रिति र प्रचलनलाई निरन्तरता दिन आजको यो कार्यक्रमले सहयोग पुर्याउने रोट्रयाक्ट जोन १८ का जेड.आर.आर लक्षमण रेग्मीले बताए।
प्रसाद वितरणसँगै सरसफाइका लागि २ वटा डस्टबिन समेत वितरण गरेको रोट्रयाक्ट क्लब अफ लुम्बिनी सिद्धर्थनगरका पुर्व अध्यक्ष दिनेश अग्रवालले बताए।
रोट्रयाक्ट क्लब अफ भैरहवा चौतारीका संस्थापक अध्यक्ष निखिल धोज खत्रीले हिन्दु परम्परा र संस्कृतीलाई जगेर्ना गर्दै आगामी दिनमा पनि यस्ता कार्यक्रमलाई निरन्तरता दिने बताए।
बिहान सात बजेदेखि सुरु भएको प्रसाद वितरण कार्यक्रममा ४ सयभन्दा बढिलाई प्रसाद वितरण गरेको निवर्तमान अध्यक्ष समिर बस्नेतले बताए।
दूध, घिउ प्रशस्त पाइने साउन महिनामा आउँदो जाडो र वर्षे कामको थकानबाट बच्नका लागि खीर खाने प्रचलन रहेकाले साउन १५ काे विशेष महत्व रहेकाे जानकारवालाहरु बताउँछन्।