सुनसरी- बराहक्षेत्र नगरपालिकामा डेंगुका बिरामी ह्वात्तै बढेपछि वडा नम्बर २ कार्यालय र चतरा अस्पतालले लार्भा सर्च एन्ड डिस्ट्रोय अभियान चलाएको छ।
त्यसका लागि हालसम्म विषादी छर्ने फगिङ मेसिन नगरपालिका र अस्पतालमा उपलब्ध थिएन। उक्त समस्यालाई मध्यनजर गर्दै चतरा अस्पताल र बराहक्षेत्र–२ वडा कार्यालयको सहकार्यमा ७५ हजार रुपैयाँमा फगिङ मेसिन खरिद गरिएको वडाध्यक्ष होमप्रसाद गौतम जानकारी दिए।
चतरा अस्पतालमा ३५५ जनाको डेंगु परीक्षणमा ७२ जनामा पजिटिभ देखिएको छ। अस्पतालका स्वास्थ्यकर्मी तथा प्रवक्ता यम भण्डारीका अनुसार हाल ३ पुरुष र २ महिलालाई अस्पतालमा भर्ना लिई उपचार भइरहेको छ।
अन्य पजिटिभ लक्षण देखिएका बिरामीहरू आ-आफ्नो घरमै उपचार गराइरहेका छन्। वर्षायाम अझै बाँकी रहेकाले डेंगुका बिरामी बढ्न सक्ने भण्डारीले जानकारी दिए।
उक्त फगिङ मेसिन खरिद गरिसकेपछि बिहीबार र शुक्रबार वडा नम्बर २ का विभिन्न ठाउँमा लामखुट्टेका लार्भा सर्च एन्ड डिस्ट्रोय (खोज र नष्ट गर) असभयान चलाइएको छ। ती इलाकामा कीटनाशक औषधि छिटिसकेको र बाँकी स्थानहरू ओमशान्ति, सिंहदेवी र पुनर्वासलगायतमा आज शनिबार अभियान सञ्चालन गरिएको वडाध्यक्ष गौतम जानकारी दिए।
अस्पतालको हाताभित्र महिनाको ४ चोटी कीटनाशक औषधि छिट्ने कार्यक्रम चलाइने स्वास्थ्यकर्मी योगेन्द्र कट्टेलले जानकारी दिए। स्वास्थ्य शाखा बराहक्षेत्रमा ४ वटा ५ लिटर क्षमता भएको स्प्रे मेसिन मौज्दात छ। उक्त स्प्रे मेसिनले कीटनाशक औषधि छिटिने स्वास्थ्यकर्मी उमेश मेहताले जानकारी दिए।
स्वास्थ्य शाखा बराहक्षेत्रले डेंगुबाट बच्न वडा १ देखि ११ सम्ममा लामखुट्टेको लार्भा नष्ट गर्न कीटनाशक औषधि छिट्ने अभियान र न्यूनीकरणको प्रयास गरिरहेको छ।