काठमाडौं- रौतहट गरुडा नगरपालिका-१ जयनगरस्थित गौर-चपुर सडकमा गौरबाट जयनगरतर्फ जाँदै गरेको बीआर ०५ पीए ६९५३ नम्बरको स्कारपियो मंगलबार दिउँसो दुर्घटना हुँदा गाडीमा सवार ६ जनाको मृत्यु भएको छ । नरकटियाबाट गमहरीयामा जन्ती जाँदै गरेको अवस्थामा आनियन्त्रित भई सडक छेउको खेतमा पल्टिदा गम्भीर घाइते भएका उनीहरुमध्ये ५ जनाको हेल्थ ल्याण्ड अस्पताल तथा शिवदर्शन अस्पताल सुकदेवचोकमा उपचारको क्रममा र १ जनाको थप उपचारका लागि वीरगंजतर्फ लैजाने क्रममा बाटोमै मृत्यु भएको हो । दुर्घटनामा घाइते भएका २ जनाको ग्राण्डी अस्पताल गरूडामा उपचार भइरहेको छ ।
महोत्तरी जलेश्वर नगरपालिका-१ क्याम्पस चोकमा प्रदेश २-०२-००३ प ०१७५ नम्बरको मोटरसाइकलले साईकललाई मंगलबार दिउँसो ठक्कर दिँदा साईकलयात्री हाल नाम, थर, वतन नखुलेका करिब ६५ वर्षीय पुरुषको मृत्यु भएको छ । ठक्करबाट गम्भीर घाइते भएका उनको उपचारका लागि जिल्ला अस्पताल जलेश्वरतर्फ लैजाने क्रममा बाटोमै मृत्यु भएको हो । मोटरसाइकल चालकलाई प्रहरीले नियन्त्रणमा लिएको छ ।
झापा झापा गाउँपालिका-४ रुईमारीमा मे.१ त ४७०९ नम्बरको ट्याक्टर आफै अनियन्त्रित भई मंगलबार दिउँसो दुर्घटना हुँदा चालक सोही गाउँपालिका चरतागाछी बस्ने २२ वर्षीय सुनिल हेमरनको घटनास्थलमै मृत्यु भएको छ ।
यसैगरी झापा दमक नगरपालिका-२ भाङबारी तितृचोकमा प्र.१-०२-०४३ प ६९२६ नम्बरको मोटरसाइकल आफै अनियन्त्रित भई रुखमा ठोक्किएर मंगलबार राति दुर्घटना हुँदा हाल नाम, थर, वतन नखुलेका ३ जना व्यक्तिको घटनास्थलमै मृत्यु भएको छ ।