काठमाडौं- स्याङ्जा पुतलीबजार नगरपालिका-२ हुडिकोट बस्ने ६६ वर्षीय दिलमान सिंह गुरुङलाई ७ केजी ८ सय ग्राम अवैध लागूऔषध गाँजा सहित बिहीबार साँझ प्रहरीले पक्राउ गरेको छ । जिल्ला प्रहरी कार्यालय स्याङ्जाबाट खटिएको प्रहरीले उनको घरमा जाँच गर्दा उक्त गाँजा फेला पारी उनलाई पक्राउ गरेको हो ।
सुर्खेत वीरेन्द्रनगर नगरपालिका-६ मंगलगढीबाट २ सय ४० मिलिग्राम अवैध लागूऔषध ब्राउनसुगर जस्तो देखिने खैरो धुलो पदार्थ सहित सोही नगरपालिका-२ बस्ने १९ वर्षीया निशा गिरीलाई बिहीबार दिउँसो प्रहरीले पक्राउ गरेको छ । जिल्ला प्रहरी कार्यालय सुर्खेतबाट खटिएको प्रहरीले उनलाई उक्त पदार्थ सहित फेला पारी पक्राउ गरेको हो ।
कास्की पोखरा महानगरपालिका-३० पावरहाउसबाट करिब १ किलोग्राम अवैध लागूऔषध गाँजा सहित लमजुङ बेंशीशहर नगरपालिका-७ बेंशीशहर बस्ने २३ वर्षीय सचिन गुरुङलाई बिहीबार साँझ प्रहरीले पक्राउ गरेको छ । ग.१ ज १२२२ नम्बरको ट्याक्सीलाई वडा प्रहरी कार्यालय गगनगौंडाबाट खटिएको प्रहरीले जाँच गर्ने क्रममा ट्याक्सीमा सवार गुरुङलाई उक्त गाँजा सहित फेला पारी पक्राउ गरेको हो ।