काठमाडौं- बैतडी, रुकुम पश्चिम, सर्लाही, कैलाली र झापाका छुट्टछुट्टै स्थानामा भएको सवारी दुर्घटनामा ९ जनाको मृत्यु भएको छ ।
बैतडी पाटन नगरपालिका-१ सकारस्थित सडकमा पाटनबाट सकारतर्फ जाँदै गरेको से.१ ज ८८८ नम्बरको जिप सडकबाट अन्दाजी १ सय मिटर तल खसेर सोमबार साँझ दुर्घटना हुँदा जिपमा सवार सुरनया गाउँपालिका-४ बस्ने २४ वर्षीय प्रेम सुनारा सहित ५ जनाको मृत्यु भएको छ । दुर्घटनामा घाइते भएका उनीहरुको उपचारको लागि प्राथमिक स्वास्थ्य केन्द्रतर्फ लैजाने क्रममा बाटोमै मृत्यु भएको हो । साथै दुर्घटनामा घाइते भएका जिपमा सवारमध्ये १ जनालाई डडेल्धुरा अस्पताल डडेल्धुरा र ४ जनालाई प्राथमिक स्वास्थ्य केन्द्र पाटन लगिएकोमा ३ जना उपचार पश्चात डिश्चार्ज भएका छन् । सामान्य घाइते भएका जिप चालकको प्रहरीको निग्रानीमा उपचार भइरहेको छ ।
रुकुम पश्चिम मुसिकोट नगरपालिका-२ स्थित रातामाटा भन्ने स्थानमा रा.१ ख २१०९ नम्बरको बस सोमबार साँझ दुर्घटना हुँदा बसमा सवार हाल नाम, थर, वतन नखुलेका १ जनाको मृत्यु भएको छ । दुर्घटनामा गम्भीर घाइते भएका उनको उपचारको लागि लैजाने क्रममा बाटोमै मृत्यु भएको हो । दुर्घटनामा घाइते भएका बसमा सवार ३८ जनालाई उपचारको लागि जिल्ला अस्पताल लगिएकोमा ५ जनालाई नेपालगञ्जतर्फ रिफर गरिएको छ भने १३ जना उपचार पश्चात डिस्चार्ज भएका छन् । हाल फरार बस चालकको प्रहरीले खोजी गरिरहेको छ ।
सर्लाही हरिवन नगरपालिका-९ सुखेपोखरीस्थित सडकमा हाल नम्बर नखुलेको सवारी साधनको ठक्करबाट हाल नाम, थर, वतन नखुलेका अन्दाजी ४५ वर्षीय पुरुषको सोमबार साँझ मृत्यु भएको छ । ठक्करबाट गम्भीर घाइते भएका उनको नमुना अस्पताल हरिवनमा उपचारको क्रममा मृत्यु भएको हो । ठक्कर दिने सवारी साधनको प्रहरीले खोजी गरिरहेको छ ।
कैलाली जानकी गाउँपालिका-४ डाँडा कञ्चनपुरस्थित सडकमा पहलवालपुर कन्द्रा नदीबाट बालुवा लिएर टिकापुरतर्फ जाँदै गरेको से.१ त ५९४४ नम्बरको ट्याक्टरबाट खसेर टिकापुर नगरपालिका-२ विजयनगर शिविर बस्ने २३ वर्षीय अरुण चौधरीको सोमबार साँझ मृत्यु भएको छ । दुर्घटनामा गम्भीर घाइते भएका उनको टिकापुर अस्पतालमा उपचारको क्रममा मृत्यु भएको हो । ट्याक्टर चालकलाई प्रहरीले नियन्त्रणमा लिएको छ ।
झापा मेचीनगर नगरपालिका-१२ पानी टंकी छेउस्थित सडकमा रोकेर राखेको को.१ त ४०१६ नम्बरको ट्याक्टरमा मे.९ प ६००३ नम्बरको मोटरसाइकल ठक्कर खाई सोमबार राति दुर्घटना हुँदा मोटरसाइकल चालक बुद्दशान्ति गाउँपालिका-२ बस्ने ३५ वर्षीय भिम प्रसाद पौडेलको मृत्यु भएको छ । दुर्घटनामा गम्भीर घाइते भएका उनको मनकामना अस्पताल चारआली हुँदै बिर्तासिटी अस्पताल बिर्तामोडमा थप उपचारको क्रममा मृत्यु भएको हो ।