काठमाडौं- धनुषा मिथिला नगरपालिका-७ ढल्केवरस्थित सडकमा हाल नम्बर नखुलेको सवारी साधनको ठक्करबाट पैदलयात्री हाल नाम, थर, वतन नखुलेका अन्दाजी ३५ वर्षीय पुरुषको सोमबार बिहान घटनास्थलमै मृत्यु भएको छ । ठक्कर दिने सवारी साधनको प्रहरीले खोजी गरिरहेको छ ।
रुपन्देही तिलोत्तमा नगरपालिका-१५ कोटिहवास्थित सडकमा लु.६४ प ४१९१ नम्बरको मोटरसाइकलको ठक्करबाट पैदलयात्री अर्घाखाँची घर भई हाल सोही ठाउँस्थित पंचकन्या स्टिल फ्याक्ट्रीको क्यान्टिनमा काम गर्ने १९ वर्षीया करिश्मा थापा मगरको आइतबार दिउँसो मृत्यु भएको छ । ठक्करबाट गम्भीर घाइते भएकी उनको क्रिमसन अस्पताल मणिग्राममा उपचारको क्रममा मृत्यु भएको हो । मोटरसाइकल चालकलाई प्रहरीले नियन्त्रणमा लिएको छ ।
बाजुरा बडिमालिका नगरपालिका-८ सुवाकांधस्थित सडकमा मार्तडीबाट राप्कातर्फ जाँदै गरेको सु.प.प्र.०१-००१ ह ४२८२ नम्बरको अटो सडकबाट अन्दाजी ६ सय मिटर तल खसेर आइतबार साँझ दुर्घटना हुँदा अटोमा सवार बुढीगंगा नगरपालिका-१ अमकोट बस्ने ६० वर्षीय प्रकाश नेपाली र ६२ वर्षीय खगेन्द्र पाध्यायको घटनास्थलमै मृत्यु भएको छ । साथै दुर्घटनामा घाइते भएका अटोमा सवार २ जनाको उपचारको लागि जिल्ला अस्पताल पठाइएको छ । अटो चालकलाई प्रहरीले नियन्त्रणमा लिएको छ ।
बाँके राप्तीसोनारी गाउँपालिका-२ अघैयास्थित सडकमा कोहलपुरबाट दाङतर्फ जाँदै गरेको प्र ३-०१-०२२ च ५८८४ नम्बरको कारको ठक्करबाट दाङ तुलसीपुर उपमहानगरपालिका-२ बस्ने ४० वर्षीय हुकुम डाँगीको आइतबार राति मृत्यु भएको छ । ठक्करबाट गम्भीर घाइते भएका उनको मेडिकल कलेज कोहलपुरमा उपचारको क्रममा मृत्यु भएको हो । ना.७ ख ३३९ नम्बरको विवाहको बस रोकी पिसाब फेर्न झरी बाटो काट्दै गरेका डाँगीलाई उक्त कारले ठक्कर दिँदा दुर्घटना भएको हो ।