काठमाडौं– एमालेका नवनिर्वाचित उपाध्यक्ष युवराज ज्ञवालीले आफ्नो पार्टीप्रति जनताको आकर्षण निरन्तर बढ्दो रहेको दाबी गरेका छन् ।

रिपोर्टर्स क्लबको साक्षात्कारमा बोल्दै उनले एमाले नै आगामी निर्वाचनपछि पनि पहिलो दल बन्ने र बहुमत ल्याउने दाबी गरे । ‘नेपालको इतिहासमा यति धेरै जनसहभागिता कुनै पनि पार्टीको कार्यक्रममा भएको थिएन । मैले सबै दलका महाधिवेशन, अधिवेशन, आमसभा हेरेको छु, यसपटकको हाम्रो महाधिवेशनमा पाँच लाख जनता उतार्ने योजना थियो । तर, त्यसभन्दा पनि धेरै जनसमुदायको उपस्थितिमा हाम्रो उद्घान सम्पन्न भयो,’ उनले भने, ‘एमालेप्रति जनताको आकर्षण निरन्तर बढ्दो अवस्थामा छ । जनसहभागिताको हिसाबले १०औं महाधिवेशन ऐतिहासिक भयो । इतिहासमै कुनै एउटा पार्टीले यत्रो जनसमूदायको उपस्थितिमा कार्यक्रम गरेको थिएन । अहिले पनि एमाले संसद्मा सबैभन्दा ठूलो पार्टी छ । आउने दिनमा पनि यो पार्टीले बुहमत ल्याउने कुरा स्थापित भइसकेको छ । यो कुरा चितवनको जनसभाले पुष्टि भयो ।’

ज्ञवालीले फेरि पनि वामपन्थीहरूबीच एकताको आवश्यकता रहेको औंल्याए । ‘एमालेसामू चुनौति छन्, एउटा पार्टी फुटेर तीन टुक्रा भयो । एमाले पनि फुटेको छ । हामीले सरकार ५ वर्ष चलाउन सकेनौं । अहिले कांग्रेसको नेतृत्वमा सरकार बनेको छ । हामीले कमिकमजोरी कहाँ रह्यो भनेर समिक्षा गर्नुपर्छ । हामीले विचार, प्रवृत्ति, सोच, दृष्टिकोणलाई समीक्षा गर्न जरुरी छ । पार्टीलाई एकताबद्ध बनाउनुपर्छ । मैले आफ्नो तर्फबाट सक्दो भूमिका निर्वाह गर्छु,’ उनले भने, ‘फेरि पनि वामपन्थीबीच एकता आवश्यक छ । हामीले नेकपाको एकता बचाउन सकेनौं । अब एकले अर्कालाई आरोपित गरेर मात्रै हुँदैन । अब एउटा नेतालाई मात्रै दोष दिएर हुँदैन । एकता बचाउन नसक्नुमा सबैको दोष छ । जनमत किन टिकाउन सकेनौं भनेर आत्मसमीक्षा गर्नुपर्छ । विगतका कुरामा आरोपित गर्नुहुँदैन । फेरि पनि वामपन्थी र कम्युनिस्टहरू बीच एकता आवश्यक छ । सबै पार्टीका नेता तथा कार्यकर्ताले सकारात्मक रूपले सोच्नुपर्छ ।’