काठमाडौं- यस वर्षको मनसुन नेपाल भित्रिने केही दिन ढिलो हुने जल तथा मौसम विज्ञान विभागले जनाएको छ।

विभागका अनुसार मनसुन प्रणाली भारतको उत्तरपूर्वी भेग, बंगलादेश र भुटान आइपुगेको छ। नेपालमा भने केही दिन ढिलो गरी मनसुन प्रणाली भित्रिने देखिएको छ।

नेपालमा मनसुन भित्रिने सरदर १३ जुन अर्थात आज हो। पूर्वी भूभाग अर्थात कोशी प्रदेशबाट नेपालमा मनसुन भित्रिने गर्छ। मनसुन भित्रिन ढिलाइ भएकै कारण देशभर गर्मी अत्यधिक बढेको छ।

खासगरी, मध्य र पश्चिम तराईमा अधिकतम र न्यूनतम तापक्रम वृद्धि भइरहेको विभागले जनाएको छ। यस्तै, काठमाडौंलगायत देशका अन्य उपत्यका तथा खोंचहरूमा पनि तापक्रममा वृद्धि भएको छ। मध्य र पश्चिम तराईमा अधिकतम तापक्रम ४० डिग्री सेल्सियसभन्दा बढी मापन भएको छ।

आगामी केही दिनसम्म सुदूरपश्चिम, लुम्बिनी र गण्डकी प्रदेशका तराईमा प्रचण्ड गर्मी हुने विभागले जनाएको छ। वागमती प्रदेशका तराई भेग तथा र मधेश प्रदेशको पश्चिमी भेगमा थोरै तापक्रम घटे पनि अत्यधिक गर्मीको सम्भावना यथावत् रहने छ।

विभागका अनुसार ती भूभागहरूमा आगामी चार दिन तातो हावा तथा ‘लू’को सम्भावना यथावत् रहने देखिएको छ। मधेश प्रदेशको पूर्वी भेगमा पनि तापक्रम केही घट्ने सम्भावना देखिए पनि गर्मीको सम्भावना यथावत् छ।

यस्तै, पश्चिमी पहाडी भेगका उपत्यका र खोंचहरूमा पनि तापक्रम यथावत् रहन सक्ने सम्भावना छ। कोशी प्रदेशमा बदली र वर्षाको सम्भावना रहेकाले तापक्रम घट्ने सम्भावना छ।