भैरहवा- यहाँ बन्ने एकीकृत जाँच चौकी बिहीबार प्रधानमन्त्री पुष्पकमल दाहाल ‘प्रचण्ड’ र भारतीय समकक्षी नरेन्द्र मोदीले नयाँदिल्लीबाट संयुक्त रूपमा शिलान्यास गरे।
दुवै प्रधानमन्त्रीले डिजिटल स्विच थिचेर जाँच चौकी शिलान्यास गरेका हुन्। त्यसक्रममा भैरहवा र सुनौली दुवैतर्फका जाँच चौकी शिलान्यास गरिएको छ।
त्यससँगै बिहीबार दुवै प्रधानमन्त्रीको उपस्थितिमा दुई मुलुकबीच ७ वटा सम्झौतामा पनि हस्ताक्षर भएको छ।
नेपाल र भारतबीच क्यूआर कोडमार्फत वित्तीय कारोबार गर्न दुईपक्षीय सम्झौता भएको छ। अहिलेसम्म कार्डको माध्यमबाट वस्तु तथा सेवा खरिदमा क्रस बोर्डर (अन्तरदेशीय) भुक्तानी गर्न सकिए पनि क्यूआर कोडमार्फत वित्तीय कारोबार गर्न पाइँदैन। तर, अब भारतमा भुक्तानी प्रणाली सञ्चालन गरिरहेका दुई कम्पनीको ‘सिस्टम कनेक्ट’ गर्ने सम्झौतामा नेपाल क्लियरिङ हाउस र भारतको नेसनल पेमेन्ट कर्पोरेसन अफ इन्डियाबीच सम्झौता भएको छ।
तल्लो अरुण जलविद्युत आयोजनाको परियोजना विकास सम्झौता (पीडीए) भएको छ। सुदूरपश्चिम प्रदेशको कञ्चनपुरमा सुक्खा बन्दरगाह निर्माण गर्न नेपाल र भारतबीच सहमति भएको छ। ४०० केभी क्षमताको न्यू बुटवल-गोरखपुर अन्तरदेशीय प्रसारणलाइन, फुकोट कर्णाली अर्धजलाशययुक्त जलविद्युत आयोजना, दुई वटा पेट्रोलियम पाइपलाइन र पेट्रोलियम भण्डारणका तीन परियोजना बनाउन नेपाल र भारतबीच समझदारी भएको छ।
भारतको सिलिगुडीदेखि नेपालको झापाको चारआलीसम्म पेट्रोलियम पाइपलाइन निर्माण हुनेछ। यस्तै, अमलेखगञ्जसम्म रहेको हालको पेट्रोलियम पाइपलाइनलाई विस्तार गरेर चितवनको लोथरसम्म ल्याउन पनि दुई देशबीच समझदारी भएको छ। भारतले झापाको चारआलीमा पेट्रोलियम भण्डारण डिपो पनि बनाउने छ।
भारतीय प्रधानमन्त्री मोदीले भैरहवामा आईसीपी निर्माणपछि दुई मुलुकबीच तीर्थयात्रा र पर्यटन फस्टाउने विश्वास व्यक्त गरे। वर्षौंदेखिको प्रयासबाट भारत र नेपालको एकीकृत जाँच चौकी सुविधायुक्त बन्ने तथा दुवै मुलुकमा आवतजावत सहज हुने भारतका केन्द्रीय वित्त राज्यमन्त्री पंकज चौधरीले बताए।