सुनसरी- ग्रामीण पत्रकार समूह विवादका बीच ६ महिनापछि निर्वाचन समितिले सर्वसम्मतिबाट पदाधिकारी चयन गर्ने प्रयास गरे पनि विवादरहित बन्न सकेन।

गत २४ मंसिरमा समूहको चौथो साधारण सभा सम्पन्न भएपछि नयाँ कार्यसमितिमा अध्यक्ष पदमा ४ जना आकांक्षीको दाबी भएपछि एकअर्कामा सहमति जुट्न नसक्दा निर्वाचन हुन सकेको थिएन।

अध्यक्ष पदका लागि संस्थाका संस्थापक अध्यक्ष बाबुराम कार्की र दीपक पुरी प्रेस युनियन आबद्ध हुन् भने कृष्णकुमार श्रेष्ठ (अर्जुन) प्रेस चौतारीबाट एक्ला प्रतिस्पर्धी र निवर्तमान अध्यक्ष हिरण्य कार्कीको अध्यक्ष पदमा उम्मेदवारी दाबी थियो।

निर्वाचन सम्पन्न गर्न र गराउन भीषण राईको संयोजकत्वमा नवराज विष्ट र छबिना मगरसहितको ३ सदस्यीय निर्वाचन समिति गठन भएको थियो।

अध्यक्षका आकांक्षी हिरण्य कार्की, अर्जुन श्रेष्ठ र दीपक पुरीले निर्वाचन समितिले निर्वाचनको विषयमा चासो, तयारी र प्रकृया अघि नबढाएको आरोप लगाउँदै उनीहरूले संयुक्त रूपमा विज्ञप्ति समेत निकालिसकेका छन्।

उक्त विज्ञप्तिलाई समर्थन गर्दै प्रेस युनियन र प्रेस चौतारीका बराहक्षेत्र संयोजक संगम बिष्ट र लक्ष्मण कटुवालले संयुक्त रूपमा हस्ताक्षर गर्दै निर्वाचन तोकिएकै समयमा गराउन माग गरेका थिए।

गत वर्ष मंसिरदेखि ग्रामीण पत्रकार समूह पदाधिकारीविहीन र निष्क्रियजस्तै भएको थियो।

१७ जेठ बुधबार निर्वाचन समितिले हिरण्य कार्की अध्यक्ष, कृष्णकुमार श्रेष्ठ (अर्जुन) उपाध्यक्ष, सुविन विश्वकर्मा सचिव, सुधन गुरागाईं सहसचिव, गंगा भट्टराई कोषाध्यक्ष तथा सदस्यमा राजन घिमिरे र सृजना थापाको कार्यसमिति घोषणा गरेको छ।

अध्यक्षका अन्य दाबेदारहरूले निवर्तमान अध्यक्ष हिरण्य कार्कीलाई सर्वसम्मति दिएपछि पुनः उनी दोस्रो कार्यकालका लागि अध्यक्ष बनेका हुन्।

निर्वाचन समितिको घोषणालाई कार्यसमितिमा सहसचिव बनाइएका सुधन गुरागाईंले इच्छाविपरीत जबर्जस्ती राखिएकामा आपत्ति जनाउँदै कार्यसमितिमा नरहेको जानकारी सामाजिक सञ्जालमार्फत गराएका छन्।

प्रेस चौतारीका बराहक्षेत्र नगर अध्यक्ष लक्ष्मण कटुवालले भने प्रेस युनियन तथा प्रेस चौतारीबीच एक किसिमको सहमति भएकोमा निर्वाचन समितिले उल्लंघन गर्दै भावनाविपरीत एकलौटी ढंगले कार्य समिति गठन गरेको आरोप लगाए। कार्यसमितिमा चयन भएका प्रेस चौतारी आबद्ध कृष्णकुमार श्रेष्ठ (अर्जुन), सुधन गुरागाईं, गंगा भट्टराई र राजन घिमिरेलाई हटाइदिन माग गर्दै सामाजिक सञ्जालमा असहमति प्रकट गरेका छन्।

निर्वाचन समितिका संयोजक राईले नियम, प्रकृया र सहमतिअनुसार नै कार्य गरेको दाबी गरे।

ग्रामीण पत्रकार समूहभित्र राजनीतिक गुट-उपगुटको चलखेलका कारण समूह फस्टाउन, अगाडि बढ्न सकेको छैन। र, पत्रकारको हकहित र अधिकारको लागि माखोसम्म मार्न नसकेको र ताक परे तिवारी नत्र गोतामेजस्तै समूह बन्न पुगेको शुभेच्छुकहरूको भनाइ छ।

बराहक्षेत्र नगरभित्रका पत्रकारहरूको हकहित र अधिकारका लागि ०७४ सालमा ग्रामीण पत्रकार समूह गठन भएको थियो।