रूपन्देही– मदिरा व्यवसायीले मदिरा व्यवसायमा हरेक वर्ष कर वृद्धि गरेकाे भन्दै मदिरा व्यवसायीले आपत्ति जनाएका छन्।
साेमवार मदिरा व्यवसायी संघ रूपन्देहीले केन्द्र र लुम्बिनी प्रदेशमा निर्वाचितहरूलाई बधाई, सम्मान र शुभकामना दिन आयाेजना गरेकाे कार्यक्रममा बाेल्ने मदिरा व्यवसायीले राज्यले नै उपेक्षित गरेकाे भन्दै मदिरा खरिद गर्दा आधिकारिक डिलरबाट खरिद गर्न आग्रह गरे।
उनीहरुले भारतबाट आउने मदिरालाई निषेध गर्न सके व्यवसाय फस्टाउन सक्ने बताए।
केन्द्रीय अध्यक्ष साेनम शेर्पाले मदिरा व्यवसायमा समस्या भयाे भनेर ज्ञापन पत्र बुझाउँदा सुनुवाइ नभएकाे बताउँदै समस्या प्रति निरन्तर जुधेर अगाडि बढ्ने बताए। उनले व्यवसायमा इमान्दारिताका साथ लागेमा सफल भइने बताउँदै नक्कली काम गर्नेलाई कानुनी दायरामा ल्याउन महासंघ पछि नहट्ने बताए।
लुम्बिनी प्रदेश अध्यक्ष शम्भु प्रसाद भट्टराईले सरकार गम्भीर नभएकाे बताउँदै काेभिडकाे बेला सटर बन्द गरेर बस्दा समेत छुट नदिएकाे गुनासाे गरे। उनले भारतबाट पार्टी प्यालेसमा अवैध मदिरा आउने गरेकाले मदिरा व्यवसायी समस्यामा पर्दै गएकाे बताए।
मदिरा व्यवसायी संघ रूपन्देहीका अध्यक्ष कृष्ण गाैतमकाे अध्यक्षतामा भएकाे कार्यक्रममा केन्द्रीय महासचिव गाेबिन्द बराल, उद्योग व्यापार संगठन रूपन्देहीका अध्यक्ष अनिल ज्ञवाली, हाेटल तथा रेष्टुरेन्ट व्यवसायी संगठन रूपन्देहीका अध्यक्ष विष्णु न्याैपाने लगायतले आफ्ना धारणा राखेका थिए भने महासचिव किसाेर पन्थीले कार्यक्रम सञ्चालन गरेका थिए।