म स्वास्नीमान्छे !!
म, आगो पिएको मान्छे
आगोसँग खेल्दै जिएको मान्छे
आगोको भुंग्रोमा परेर
उठेका पाइतालाका फोकाहरू बिशेक हुन नपाउँदै
सोझै युद्धमा होमिएको मान्छे
म स्वास्नीमान्छे !!

समयले दिएका घाउ, चोट र निलडामसहित
छातीमा राँको बालेर
साँगुरो आली-आली र कान्लाहरू मध्यरातमा
छिचोलेको मान्छे …
राँके भूतहरूलाई पछारेर, लडाएर
आगोका मूर्छच्नासँग हाँस्दै जितेको मान्छे …
म, आगो पिएको मान्छे !!
म स्वास्नीमान्छे !!

चिन्नेहरू विभिन्न उपमाहरू दिन्छन्
’उग्रचण्डी’, ‘रणचण्डी’, ‘महाकाली’ जगाउँदै
अनेक असुरहरूका विरुद्ध चुनौतीको पहाड बनेर उभिएको
न्यायको पुल्ठो बाल्दै चट्टानझैं … म,
परिस्थितिका पहरा फोरेर उदाएको मान्छे ……

म, तिम्रो क्यान्भासमा सजेको मोनालिसा होइन
तिम्रो कुचीको टुप्पोमा लत्पतिएको रंग होइन,
म, कठोर अग्नि अनि शिखा भएको मान्छे
हत्केलामा फोका उठ्दा ‘ऐया’ नभनी धैर्य गर्दै
छातीमा गोली थाप्न तयार भएको मान्छे … म,
पुर्खाको त्याग, बाबु बाजेको आदर्श
अनि, भाइबहिनीको खुशी बटुल्दै
हिँडेको मान्छे , म आगो पिएको मान्छे !!!
म स्वास्नीमान्छे !!

मान्छे-मान्छे बीचको
असमान पर्खालका विरुद्ध
सधैं उभिएको मान्छे …
राता-सेता सबै मानिसहरूको कठोर भिडबाट जन्मिएर
समय र परिवर्तनको विद्रोह बाँचेको मान्छे
म, परिवेशलाई चिनेर बाटो हिँडेको मान्छे
म, आगो पिएको मान्छे !!!
युद्धमा होमिएको सिपाहीजस्तै
दुश्मनको छातीमा निशाना ताकेर
आफ्नै टाउको बन्दकी राखेर
विजयको सिन्दुर पहिरिने तागत भएको मान्छे
म आगो पिएको मान्छे
धर्ती भएर जिएको मान्छे
सम्पूर्णतामा बाँच्न सक्ने,
हो, म ज्यूँदो स्वास्नीमान्छे !!

(प्रकाशोन्मुख कविता संग्रहबाट)